Iñaki

Nola sartu hiru hilabete maleta bakarrean.

2010-09-21T12:59:00.003+02:00

Ireki dut maleta eta sartu ditut Maialen, Karlota, Ainitze, Paco, Ari, Laia, Miriam, Clara, Sabrina, Antonio, Marta, Fina, Mar, Kepa eta Kepa Jr., Sonia (biak, Crego ere bai), GRP, seguimiento, calendario, El Espiritu Santo, Kafea eta 5 galletak, MEC orokorrean, L´Illa, Caprabo, Napolitana jamon y keso, ensalada de pasta, Plataforma, Alsa, El Gato Negro, Tarrega, Pakis guztiak, Bus 33/34, Encants, Passeig de Gracia, Moooooooonumental, Bartzeloneta, zerbeza biir, masax, massagi, sabrosa enpanada, bidegorriak, taxiak, salamandra, Hortako laberintoa, Montjuic, Plaza del sol, Sitges, Venga loca, No me rayes, Hastaluego colegas, urgentziak, anginak... Eta itxi dut.

Eta erdia baino gehiago kanpoan geratu zait.

Konturatu orduko, hemen naiz berriz.

2010-06-19T12:00:00.004+02:00

Andreurekin ahozko akordioa sinatzea izango litzateke denboraren aurkako prozesu kaotiko honen azken txanpa. Bueno, agian azken aurrena, Bartzelonara eramango gaituen autobusean leku bat "alokatzea" falta zaigulako. Hauxe eta alokairuan hartuko dugun pisuaren konfirmazioa, datorren asteleheneko eginbeharra.

Hiru hilez bizimoduz aldatuko dut, alor batzuetan behintzat. Kezkek, ordea, hor diraute, izan ere, sentsazio gozo-gazi batek harrapatu nau eta ezin dut burbuinetik atera. Ni ez naiz bukaera bat sustatzen ari, muturren aurretik bizitzan behin pasatzen den tren horietako batera igo naiz, besterik ez. Gauza da, gaur egun trenbide sareek konfigurazio berezia dutela eta edozein momentutan etxera bueltatuko zaituen beste garraiobide bat eskuragarri izan ohi dela, erraz, sarri, eta batez ere, merke.

Baliabide honetaz baliatuko naiz gauzak epel manten daitezen. Abandonatu baino, nahiago hil.

Zosma sariak!

2010-06-09T10:41:00.004+02:00

Apurtxo bat berandu nabilen arren, nik ere Zosma sarien kronikatxoa blogera igotzea erabaki dut. Zosma sarien "abenturatxo" hau gabon garaian hasi zen, komunikazio plangintza hoberena saritzen zen lehiaketa baten inguruan jakin genuenean (ados, ikasgai bat gainditzeko beharrezkoa zen bertan parte hartzea). Inolako esperantzarik gabe gure ideia garatu genuen, eta hilabete batzuk beranduago hemen gaude, gure udako bizitokia izango denaren bila! BARTZELONARA GOAZ!

HEMEN klikatuz gero, Maialen Aizpuruaren blogera zibersaltoa egingo duzu, eta bertan azaltzen da modu magistralean nola bizi genuen momentu berezi hura. Iturria beraz, aipatua. Hala ere, Maialenek Sistema eta Prozesuak irakasgaiko blogetik hartu du testua, Iosu Ganuzak ikasgairako idatzi zuen gogoetatxoa baita. Besterik gabe soilik nahi nuke esan.... GORA HEL&EN! Eta musu handi eta espezial bat Nerea Etxaniz-entzat, berebiziko lana egin baitu proiektua aurrera atera zedin.

Waka Waka eh eh!

2010-06-09T10:26:00.004+02:00

Esker anitz Iosu eta Maialeni. Datorren azterketarako be megamaratoi bat ein biharko dogu, eztakit zegaitxik, baña suerte ona emoten desta. Hori bai, hurrengorako pizzan aukeraketia gure esku Iosu, Kebab no mola U_U. Zuentzako, jada gure himnua bihurtu dan hauxe. Waka Waka!!

10. Ariketa: Iragarki sexisten bila.

2010-05-24T19:56:00.006+02:00

Emakunde elkartearen parte den Begirak zehaztu ditu "iragarki sexista" baten ezaugarriak zeintzuk izan daitezkeen. Xedea, beraz, aleatorioki 15 iragarki aukeratu (anuncios.com web gunetik hartuak) eta parametro hauen arabera filtratu egingo ditugu sexismoan jauzi diren ala ez ikusteko:

-Emakumeen aukerak eta espazioak mugatzen dituzten iragarkiak.
-Emakumeak gizonezkoen menpeko erakusten duten iragarkiak.
-Etxeko lanak emakumeen lan exklusibotzat agertzen dituzten iragarkiak.
-Etxeko lanak parodiatzen dituzten iragarkiak.
-Gorputza edo gorputzaren atalak saltzen den produktuarekin konparatzen dituzten iragarkia inolako harremanik izan gabe.
-Adituen ahots bakarra gizon batena denean.
-Emakumeen edertasuna aitzakirik gabe handiesten den iragarkietan.
-Bi sexuei erreferentzia egiteko genero maskulinoa bakarrik erabiltzen duten iragarkiak.

Hortaz, hauexek dira aukeratu ditudan iragarkiak, eta beraiengan egin dudan balorazioa.

1. Flex-Chic & Cheap.

Nolabait, nabari daiteke sexismo kutsu bat, emakume ederrak koltxoiak iragartzeko erabiltzen direlako. Gainera, hasieran off ahotsean hitz egiten duen emakumea badirudi koltxoiez beharrean gizonez ari dela, eta hau pentsatzera bultatzen duten irudiak ere eskaintzen dira. "Todas quieren uno, todas los desean y todas se estan llevando uno" dio, alegia. Ulertu daiteke emakumea gizonaren desiraren bila dabilela, eta bestalde, edertasunaz bestelako produktu bat iragartzeko neska politak erabili direla, atrezzo gisa. Zentzu horretan, bai, sexista litzateke.

2. Evax-Demo.

Emakumearen irudia erabiltzen da, baina konpresen iragarki baten aurrean gaude, nola ez da ba erabiliko emakumea? Bestalde, ez da neska sexual bat erakusten, nire ustez, Emakundek ezarritako pautak errespetatzen ditu, eta nahiz eta iragarki tentela iruditzen zaidan (zergatik dirudi beti konpresak iragartzen dituzten emakume horiek sustantzia aluzinojenoen menpe daudela?), ez zait sexista iruditzen.

3. Honda-Heroes.

Ez da emakumearen irudia erabiltzen, beraz, ez da bereganako mehatxurik nabari. Hori bai, komentatzearren soilik, kuriosoa da nola kotxeen iragarkietan gizonezkoaren irudi heroikoa sustatzen den, kasu honetan gainera, literalki. Kotxeak gizona den "heroia" azaleratzen du. Ez da, ordea, sexista. Gertatzen dena da gizonezkoak garela iragarkiaren targeta, eta badakigu gizonek heroi izate hori izugarri maite dugula :P

4. Wilkinson for women-Bikini

Hemen ere emakume lirainak erabiltzen dira depilatzeko aparailu berri bat iragartzeko. Uste dut edertasuna aitzakiarekin erabili dela, izan ere, produktua esklusiboki emakumeentzako zuzendua da. Beraz, eta nahiz eta errealitatetik at dagoen emakumearen prototipoa eskaintzen den, ez zait sexista iruditzen.

5. Repsol-Microalgas.

Iragarki hau juxtu sexismoaren ezaugarriak alderantzizkatzen ditu. Erabiltzen da, bai, emakumearen irudia. Baina orain arte gizonezkoek izan duten rola neskato batek hartu du Repsoleko iragarkian, izan ere, kimilakari profesional bat bezala azaltzen zaigu. Beraz, betiko pautekin apurtzen duen iragarkiaren aurrean gaude.

6. Axe-Sofaurus

Axeren iragarkietan ohikoa da sexismoa aurkitzea. Publizitatearen historiarako eginiko sexismoaren lanean ere aztertu nuen lez, objektu sexual gisa azalduko den emakumea Axeren puntu fuertea da. Gainera modu oso nabarian egiten du. Azken finean, Axerekin emakume ederrenak lortuko dituzula esan nahi da, eta honek Begirak zehaztutako hainbat ezaugarri urratzen ditu: Alde batetik gizonak emakumearen gainean duen menpekotasuna dago, eta bestetik neskatxo biluzien erabilera produktuarekin zer ikusirik ez duelarik. Ondorioa: iragarki hau sexista da.

7. Port Aventura-Celebra la vida

Ez du inongo kutsu sexistarik.

8. Celta-Los Celtunis

Emakumearen rol sexista azpimarratzen duen iragarkiaren aurrean gaude, non ama bat aurkezten zaigun bere semea zaintzen eta supermerkatuan erosketa egiten. Beraz, nahiz eta goian aipatutako baldintzen aurka ez doan, sexista da sexu rol sexistak jarraitzen dituelako.

9. Metro de Madrid-Niño

Ez dut uste sexista denik.

10. Coca Cola-Dile a tu cabeza.

Hauxe ere sexista ez dela deritzot.

11. McDonalds-Tipos de clientes

Hau ere ez da sexista Begiraren parametroen arabera.

12. Viceroy-Caballo

Nahiz eta ez den iragarki sexista, berriz ere desberdindu dezakegu zein izan ohi den gizonezkoaren papera publizitatean. Kasu honetan, Fernando Alonso da preskriptore, eta berriz ere dominatzaile gisa erakusten zaio, nahiz eta ez den emakumearen irudirik. Heroia da, adoretsua. Gizonak horrelako perfila izan ohi du iragarki askotan.

13. El Corte Ingles-Ya es primavera

Arropa iragartzen den iragarkia dugu hemen, eta noski, emakume lirainak erabili dira iragarkia apaintzeko. Hala ere, uste dut iragartzen denarekin zer ikusia duela eta nahiz eta emakumearen irudi ez-erreal bat erakusten den, ez dut sexista kontsideratzen. Emakume lirainak erakusten dira, baina ez du bere irudia gutxiezten.

14. Baileys-Chica hablando a cámara.

Aitortu behar dut. Iragarkia ikusi nuen lehen aldian, iragarki sexista kontsideratu nuen. Emakumeak publizitatean hartu duen roletako bat, neska gazte sexy eta dominantearena da, beti ere ikuskera sexual batetik. Iragarki hau badirudi gizonari zuzenduta dagoela, neska "katxarroak" telebistaren beste aldean dagoen tipoa seduzitu nahiko balu bezala. Hortaz, ikusten diot sexismo kutsu bat, emakumearen irudi sexy hori ez doalako iragartzen den edari alkoholdunarekin bat eta gizonezkoaren gizontasuna saritzen duen garaikur bat bezala islatzen delako.

15. Seat-Good Stuff

Iragarki hau ez da sexista, nahiz eta Shakiraren irudia erabiltzen den.

9. Ariketa: Publizitatea ezpata eta paretaren artean.

2010-05-24T18:47:00.003+02:00

Artikulua irakurri eta galderak erantzun ditut. Jarraian aurkezten dira erantzunak:

1) Zergatik da kaltegarria iragarki bati egindako salaketa, salaketa horrek funtsik ez duenean ere?

Demagun, adibidez, Caribeko hotel kate batek kanpaina berri bat zabaldu nahi duela hainbat herrialdetan. Hauxe dela eta, eta iragarkiari ukitu exotikoa ematearren, bainujantzi nimiñoez jantzitako emakumeak erakutsiko dira eguzkia hartzen. Demagun, baita ere, iragarkia kaleratzen dela eta emakumearen aldeko erakundeek enpresa salatzen duela. Berdin dio Caribeko hotel konpainia horrek legearen pauten barruan jokatu baduen edo ez, gertakizunak medioetan izango duen oihartzunak ez dio batere lagunduko, ezta legeak enpresarik arrazoia emanez ere.

Gauza da, legeak eta publizitateak erritmo ezberdinetan funtzionatzen dutela. Alde batetik, sententzia kaleratzen den bitartean iragarlea ezin da arriskatu spota emititzera, kontrako epaia irteteko kasuan ordaindu beharreko kalte-ordain, zein isunak esanguratsuak izango direlako, eta zer esanik ez komunikabideetan izango duen oihartzunak, dudarik gabe enpresaren izenari kalte egingo dionak. Bestalde, ezin du spota ez emititu eta sententzia irten arte itxaron, publizitatean telebistan bezala, “denbora urrea delako”.

Ondorioz, salaketa edonolakoa izanda, iragarlearentzat buruhauste itzela da, arrazoia izan ala ez. Eta honek iragarkien sormena mugatzen du, noski.

2) Publizitatean murrizten dena, beste edukietan onartuta dago, sexua eta biolentzia kasu. Zer dela eta diskriminazio hau? Orokorrean, zergatik da legea zorrotzago publizitatearekin?

Nire ustez kontzeptu arazo baten aurrean gaude. Alde batetik zinea dugu, arte bat dena. Denok maite dugu zinea eta zine aniztasuna, zilegi da heriotza gordina erakusten duen filma edo sexu esplizituz blaitutakoa. Telebistaren kasuan ere antzera gertatzen da. Gaur egun, morboan oinarritutako programazioa da nagusi, behintzat hauxe erakusten dute audientzia indizeek. Alegia, morboa maite du herriak, edo horixe maitatzera erakutsi gaituzte, ez dakit, hori beste eztabaida bat da. Dena den, publizitatea morboan zentratzen den bakoitzean kaltegarria da, ez da legezkoa, ezta morala ere, eta askotan pentsaezina dirudien barbaridade bat ere iristera izan daiteke.

Honen arrazoia, kausa ekonomikoak alde batera utzirik (Artikuluan esaten den lez, finantzatuak diren euskarri komunikatiboak ez dute inolako mugarik), publizitatearekiko dagoen pentsamoldea litzateke. Zinea zein telebistarekiko dugun pertzepzioa fantasiosoagoa den heinean, publizitatea “serioagoa” den zerbait bezala hartzen dugu, gizarteko kideak eraldatu eta hauengan eragina izan dezakeen mehatxu baten antzera, errespontsabilitate sozial izugarria duelarik. Badirudi gizarteak ulertu duela zinean edo telebistan erakusten dena dudan jarri daitekeela, eta publizitateak ezin duela bide horretatik jarraitu. Lehena artea da (bai, informazio programak ere bai) eta bigarrena komunikazioa, lehena malgua, bigarrena oso mugatua.

3) Egileak dioenez, iragartzea debekatuta dagoen hori saldu daiteke. Nola ulertzen duzu paradoxa hau?

Erraza da. Kasu honetan, gobernuak aurpegia garbitu du publizitatearekin, besteak beste. Tabakoa, alkohola. Drogak. Osasunarentzat oso kaltegarriak eta letalak. Eta guzti honen gainetik, izugarri errentagarriak. Dirurik emango ez balute, gaur egun ezingo genuke zigarro pakete bat eskuratu, merkatu beltzean ez bada. Ordea, gobernuarentzat etekin ekonomikoa suposatzen du, baita bigarren mailako enpresentzat ere.

Baina, produktu kaltegarriak onartzearen ideia horrek bertan jarraitzen du eta gobernuak ezin du ardura hori sama gisa gainean eraman. Zer egin? Ba, mugatu. Edo mugak jarri direla erakutsi. Salduko dut baina gizartearen aurrean kontrako iritziarekin azalduko naiz. Eta patu hau jasan behar du publizitateak, baita negozio txikiek ere orain tabernetan erretzea debekatuko delako. Iritzi publikoa moldatu eta etekin ekonomikoak izaten jarraitzeko modua da debeku hau.

Kuriosoa da ordea autoreak aipatzen duen paradoxa. Tabakoa zein alkohola iragartzea debekatuta dago esparru askotan, beste batzuetan ordea ez da zehaztapenik egin. Ez izan dudarik aukera izanez gero, hortxe egongo dela produktu kaltegarri hauen publizitatea.

4) Zeintzuk dira auto-erregulazioaren abantailak iragarleentzat?

Egoera ikusita, publizitatearen munduko hiru zutabe nagusiek beraien “eskudo babeslea” sortu dute auto-erregulazioarekin. Hor dugu Autocontrol, iragarle, agentzia eta hedabideez osatzen den organismoa. Nolabait, eta modu erraz batean azaltzearren, hanka sartu baino lehen alderdi ezberdinek eginiko errebisioa litzateke Autocontrolek, publizitate kanpaina bat mundura zabaldu baino lehen eginiko prebentzioa ahalbidetzen du, irizpide sozial eta legezkoaren arabera eginiko auto-balorazio bat.

Honen bidez, iragarlea ez da arriskatuko legearen kanpo jokatzera, ezta espero ez duen polemika mediatiko batean jauztera ere. Hala ere, esan behar da Autocontrol ez dagoela edozeinen esku, partaide behar zara izan auto-baloratua izateko (Ordaindu egin behar da, zer espero zenuen, ba?). Beraz, iragarle txiki askok ezin daitezke auto-erregulatu, ondorioz, bi aukera dituzte: Iragarki politikoki zuzenak egin, edo arriskatu. Eta azken bide bezala, hain kontrolatuak ez dauden bideetara joan, Internetera adibidez.

5) Publizitatearen profesionala (izango) zarenez gero, non kokatzen duzu zeure burua? Protekzionismo osoaren muturrean (publizitate guztia estatuak erregulatuta) edo askatasun osoaren muturrean? Aldatuko zenuke iritziz hiritar sinplearen ikuspuntuan jarrita?

Ziur nago hiritar sinpleak eta publizitatean lanean ari den batek ez dutela hain iritzi ezberdina izango lantzen ari garen gai honen aurrean. Publizitatea alde batera utzirik, mugen kontu honekin pasa egin garela uste dut. Gaur egun dena dago gaizki eta dena da arriskutsua. Aurrekoan amarekin hizketan egon nintzen berak eskolan izan zuen bilera baten inguruan (bai, irakaslea da). Komentatu zidan debekatu berri dutela umeek klasera kromoak eramatea. Arrazoia? Agian, etorkizunean, umeen arteko liskarrak piztu ditzakeelako kromo-aldatze horrek.
Adibide kaxkarra da, baina ondo erakusten du gizarteak hartu duen jokabidea. Badaezpada ere, debekatu. Publizitatean ere antzera gertatu da, eta artikulura bueltatuz, Fernando Trias de Bes-ek aipatzen du Volkswagen eta ume suizidaren adibidea. Ume kokolo batek kokolokeria itzela egiteagatik, iragarkia kendu. Nire ustez, arazoa umearena da, ez spotaren sormen lanarena.

Mugatzeak eskandalua dakar: Gizartean arrunta den zerbait muga ezazu, eta jada herritarrei ez zaie arrunta irudituko. Eta hau isatsa hozkatzen duen arraintxoaren bezalakoa da. Mugak ondo daude, baita frenoak ere jarri beharko litzaieke. Ondo deritzot sexismoan edo umeentzat kaltegarria izan daitekeen ideietan jauzten diren iragarkiak mugatzeari, baina serioski hausnartu beharko litzateke ea gaur egun nagusi bilakatzen ari den jokabide honek ezer onik ekarriko duen inguruan, izan ere, nire aburuz, tabú-an oinarritutako gizarte tentel bat eraikitzen ari gara.

8. Ariketa: Barregarria zara baina... ez, ez zaitut erosiko.

2010-05-24T13:22:00.004+02:00

Alberto Sanz Galí-ren artikulua irakurrita, planteatutako galderak erantzun ditut. Jarraian datoz:

1.- Zeintzuk dira asetze publizitarioaren ondorioak hartzailearengan publizitate eraginkortasunari dagokionez?

Irakurritako artikuluak azaltzen duen lez, nahiz eta espainiarren %90ak publizitate bolumena oso handia dela esan arren, ez dira saturatuak sentitzen. Hala ere, nire ustez saturazio honek desinteresa dakar berarekin, hau da, jada sortu dugu eskudo anti-publizitario bat, eta honekin, egunean zehar “irensten” ditugun milaka inpultso publizitarioek ez dituzte memoria selektiboaren langak pasako, askoz jota epe laburreko memoriaren bitartez segundo batzuetan iragarkiak komentatuko ditugu. Baina gehienak ezta hori ere.

Klasean aztertu dugu zein garrantzitsua den kontsumitzailearen iragarkienganako jarrera. Iragarki atseginak eta desatseginenak gogoratuenak direla esan ohi da, ordea, artikuluan islatzen den ikerketaren emaitzen arabera, espainolen erdiak indiferentziaz kontsumitzen du publizitatea. Eta honek Schwerin-en hipotesien aurka egiten du. Hainbeste iragarki dago hor kanpoan azkenean indiferentziaz hartzen ditugula, honela pertsuazioa oztopatzen delarik.

2.- Zergatik ez da betetzen eduki publizitarioak mugatzen duen legeria? Nork ateratzen ditu etekinak egoera horretatik?

Erantzun erraza du honek, eta Sanz Galík ezin hobe azaltzen du bere gogoetan. Legeria ez da betetzen telebista kateengan ez duelako inolako eraginik, errieta baten ondoren semeari jostailua erosiko dion amarekin gertatzen den bezalaxe. Arauak hor daude eta noizean behin aplikatzen dira kateei isun “sinboliko” bat ezarriz, publizitatearen infrakzioak sortu dizkion diru sarreren alboan miseria hutsa da, ordea.

Beraz, telebista kateak dira guzti honetatik etekinak aterako dituzten bakarrak. Alde batetik, geroz eta publizitate esparru gehiago salduz irabaziak altuagoak izango direlako, logikoa denez. Bestalde, geroz eta eskari handiagoa dagoenez, prezioak ere gora egingo dutelako, merkatuaren legeen arabera. Eta azkenik, hain delako anitza publizitatearen presentzia, non agentziek besteengandik bereiztea nahi badute, iragarki efikaz batez gain, esparru zehatzak kontratatu behar izaten dituztelako. Eta esparru hauek prezio berezia dute, nola ez.

Ondorioz, telebista kateak dira garaile. Agentziak izugarrizko lana egin behar dute nabarmenduko den iragarki bat sortu eta kanpainaren azken helburuak lortzeko, iragarleek dirutza ordaindu beharko dute espazio onenak erosteko, eta kontsumitzaileak, zer egin gehiago bilatu beharko ditu 15 minutuko iraupena duten iragarki-tarteak ekiditeko.

3.- Iragarki “nabarmenak” egiteko ahalegina egiten denean ze nolako eragina du horrek mezuarengan?

Aurrerago esan bezala, kontsumitzailearen indiferentziak iragarki berezituen beharra suposatu die agentziei. Artikuluak dioenez, agentziek ikuslearen parte hartzea sustatzen duten publizitatea egiten hasi dira. Honegatik, arrazoia alde batera utzi eta, aurreko ariketan landu dugun lez, emozioetan kolpatzea bilatzen da, istorio bat kontatzea, umorearekin barrea eragitea. Guzti honen atzetik gelditzen da marka, ordea. Iragarkiak gogoratuko dira, hitz egingo da beraietaz, ez mezu pertsuasiboaz. Ez da helburu komertziala lortuko, helburu diferentziagarria soilik.

4.- Publizitateak gehiago entretenitu baino gutxiago saltzen omen du. Ez du ideia honek zalantzan jartzen publizitate jardunean sormenari ematen zaion garrantzia?

Erabat. Izan ere, bereizitasun horren lortze prozesuan, kreatibitateak hartu du lehentasuna. Izugarrizko artelanak aurkitu daitezke telebistan, azkena “La Caserak” egin duen iragarkia, non laburmetrai baten antza gehiago duen spot bat baino. Nolabait, badirudi nahastu direla kreatibitatea helburu komertzialak lortzeko ideia bezala, eta kreatibitatea erakartzeko ideia bezala. Publizitatea ez da erakarpena, etekin ekonomikoak lortzeko bidea da, marketina den familiako beste kide bat. Eta badirudi agentziek ahaztu egin dutela.

Argi dago ezer ez dela lortzen atentzioa deitzen ez bada, baina honek arrisku handia dakar, azkenean ikusleak ez dakielako zeren aurrean dagoen. Entretenitu da eta komentatu du hurrengo egunean La Caseraren iragarkia, baita Tuenti bidezko ekitaldi baten bidez bere lagunei zabaldu ere. Baina atsegintasun honek ez du pertsuazioa bilatu,ezta ere markaren notorietatea azpimarratu. Erronka honen azken pausoak huts egiten du.

Sormenaren xedearen birplanteamendu bat beharrezkoa da, edo kanpaina, sormenaz gain, beste estrategia batzuetan zentratzea (aipatu dira kate tematikoak, eta badago internet ere). Baina noski, esatea erraza da, publizitatearen mundua hori baino konplexuagoa baita.

Bukatzeko, hona hemen bereiztea lortu duen iragarki bat, nahiz eta mezua helaraztea lortu ez duen, agian, mezurik ere ez duelako.

7. Ariketa: 10 spoten "disekzioa"

2010-05-24T13:02:00.004+02:00

Iragarkien elementuak aztertuko ditugu oraingoan. Ordea, ezer azaltzen hasi baino lehen, aipatu behar dut ariketa hau egin zen egunean ez nintzela klasera joan (Aisi-arrazoiak medio), eta ez nituen 10 iragarki horiek ikusi, ezta taula bete ere. Hala ere, dokumentatu egin naiz eta lortu dut iragarki horien zerrenda (Janire Quintairos-en blogari esker. Irudian ikusi daitezke zein markaren iragarkiak diren), baita ariketa betetzeko behar den teoria ere (slideshare etorkizuna da).
Beraz, iragarkiak ikusi eta taula antzeko bat sortu dut. Ez ditut tamaina, kolorea, posizioa, kokalekua, bolumena eta produktuarenganako jarrera kontutan hartu, suma daitekeenez, ezagutu ezin ditzakegun datuak direlako. Umore maila, izaera didaktikoa, musika, ospetsuen erabilera eta OVER ahotsa ordea, irizpidetzat hartu ditut.

Balorazio orokorra egin eta taula osatu ondoren, emaitza batzuk ondorioztatu ditzakegu:

Emozionaltasun edo Arrazionaltasunari dagokionez, aztertutako iragarki guztiak nahi dute emozioaren bitartez hartzailea kolpatu, eta guztien %20ak arrazionaltasuna ere erabili du emozioarekin batera, beti ere maila txikiagoan, noski. Teorian ezagutzen den lez, emozioa eta arrazoia lotuz iragarkiak hobe txertatzen dira memorian, eta hau ezin hobe nabari dezakegu egindako azterketan.

Umorea nagusi da iragarkien %60an. Josebaren lanerako egindako dokumentazio lanean irakurri nuen bezala, umorea geroz eta gehiago erabiltzen den baliabidea da, guztiek maite duten emozioa baita. Ondo erabiliz gero, oso eraginkorra izan daiteke, oso bereizgarria. Hala ere, teoriak esaten duen bezala, seriotasuna kentzen dio iragarkiari, eta kontu handiz aukeratu behar da umore mota. Mercedes artxi-garesti bat ezingo litzateke barreguraren bitartez saldu, eta ordea, gasdun edari bat iragartzeko ezin hobea izan daiteke, La Caserak erakutsi digun bezala.

Eduki didaktikoaren kutsua duten iragarkien erabilera ere antzinako kontua dela dirudi, ez baitugu iragarki didaktiko bat bera ere ikusi. Hala ere, hauxe ez da orokortu egingo nukeen baieztapena, izan ere, ikusitako 10 iragarki hauek tematika jakin bat dute, eta, adibidez, garbigailu edo zukuen iragarkiak oso didaktikoak izan ohi dira, baita hortz pastenak ere. Baina orokorrean, ez da oso erabilia.

Ikusi ditugun iragarkien 100%ak erabiltzen du musika. Ordea, batean ez ezik, beste guztietan musika lagungarri hutsa da, ez du balio gogorapena errazteko, iragarleek ez dute iragarkiaren ezaugarri nagusi bezala azpimarratu. 11888-ren iragarkian ordea, Jingle-a daukagu, eta honek oroimenean eragina badu, nik behintzat melodiarekin badakidalako zer ari den iragartzen. Hala ere, oroitze-prozesuan lagungarri bada ere, ez du pertsuaziorik lortzen. Berriz ere, iragarkien izaera aztertu behar litzateke jinglea erabili ohi den edo ez zehazteko; ikerketa honen kasuan, ez da oso erabilia.

Ospetsuek eragin handia dute iragarki batekiko atsegintasuna sortzeko orduan, ez ordea oroimen edo pertsuazioan. Teoriak dioenez, iragarkien %10-a pertsonai famatuek preskribitutakoa da, ikerketan ordea %40ª famatuen bidez iragarrita daude, gainera, gizonezkoak dira kasu guztietan EITB-rena ez ezik, non telebista kateko pertsonai ezagun asko agertzen diren, emakume zein gizonak. Nolabait, ohikoaren aurka doa hauxe, izan ere, arruntagoa omen da emakume famatuaren irudia, eragin handiagoa ohi du izan. Hala ere, ez da esanguratsua, izan ere, ez litzateke logikoa izango emakume famatu batek F. C. Barcelonaren iragarkia errepresentatzea. Gaiak baldintzatzen du hauxe. Gainera, nahiz eta atentzioa beraiengan jartzeak pertsuazioa kaltetu dezakeen, hemengo adibideetan famatuak egoki erabili direla uste dut, sinesgarria da.

Azkenik, iragarki guztietatik %70ean, OVER ahotsa gizonezkoarena da, bitan emakumezkoarena eta bakarrean ez dago Over ahotsik. Teoria eta praktika eskutik doaz kasu honetan, non badirudien gizonezkoaren ahotsak legitimazio handiagoa edo sinesgarritasun handiagoa eransten dion iragarkiari. Matxismoaren isla, nire aburuz.

Ondorioztatu dezakegu beraz, klasean azaldu zena eta errealitatea ez direla hain parekoak. Hala ere, lagin-akatsa izugarria da eta ezin litzateke daturik estrapolatu, iragarkien tematikaren arabera ezaugarri batzuk gailendu eta beste batzuk baztertzen direla uste dudalako. Dena den, emozioz betetako iragarkia modan dago, noski, gizonezko baten sinadura faltako ez zaiolarik.

6. Ariketa: Post Testaren emaitzak

2010-05-24T10:33:00.006+02:00

31 bolondresek hartu dute parte Port Aventuraren kanpaina berriaren inguruan egin dugun gogorapen-testan. Facebook eta Tuenti erabili ditugu gure xederako, baita zenbait face to face inkesta burutu ere. 31 hauetatik 7 kideko abstentzio maximoa izan dugu galdera batzuetan, hala ere, orokorrean 28 izan da bataz-besteko erantzun kopurua. Ariketaren lehen fase honetan, encuestafacil web guneak eskainitako grafikoak erakutsiko ditugu, erantzunen isla gisa. Ondoren, datuak interpretatu eta ondorio argi bat atera beharko dugu: PORT AVENTURAREN KANPAINA ERAGINGARRIA IZAN AL DA? (grafikoak behar besteko argitasunarekin ikusten ez badira, egin klik irudiaren gainean)

1. Esango al zenizkidake aste honetan ikusi dituzun bost iragarki?

Inkestatuek eman dizkiguten iragarkien zerrenden arabera, gogoratuenak Mixta eta Movistar-enak dira (9 aldiz aipatu da bakoitza). Coca Cola eta Ricci Ricci-ren iragarkiak ere 6-7 aldiz agertu dira, eta gainontzekoen inguruan, ez dago ezer aipagarririk. Port Aventura 3 aldiz aipatu da, behin bigarren aukera bezala, eta birritan laugarren aukera bezala.

2. Ikusi al duzu Aisialdietarako parkeen inguruko iragarkirik?

30 erantzun izan ditugu eta 13k baietz erantzun dute. Horien artetik 3k Port Aventura aipatu dute zuzenean.

3. Gogoratzen al duzu zein iragarkiri dagozkien irudiak?

Guztiek erantzun diote galderari.
4. Irudi hauek aisialdirako gune famatu bat iragartzen dute. Zein?

29 erantzun jaso ditugu galdera honetarako.

5. Gogoratzen al duzu zein den iragarki honen slogana?

30 erantzunetatik soilik bik gogoratu dute "vive el momento " slogana.

6. Gai izango zinateke emandako aukeretatik iragarkiari dagokion slogana identifikatzen?

31 kidek erantzun dute galdera.

7. Egon al zara noizbait Port Aventuran?

30 pertsonek erantzun dute galdera.

8. Balora ezazu 1etik 5era Port Aventurako iragarkia ikusita piztu dizun joateko gogoa.

29 erantzun jaso ditugu.

9. Iragarki hau ikusi eta gero, planteatu diozu zure buruari bertara bidaia egitea? Ikusi ez baduzu, planteatuko zenuke?

29 erantzun jaso ditugu.

10. Baloratu iragarkiaren sinesgarritasuna

26 erantzun jaso ditugu.

11. Hemengo zein adjetiborekin definituko zenuke iragarkia? Zeintzuekin?

26 erantzun jaso ditugu.

12. Port Aventurarekiko zenuen irudia errespetatzen du iragarkiak?

26 erantzun jaso ditugu.

13. Nola aldatu du iragarkiak Port Aventurarekiko zenuen kontzeptua?

26 erantzun jaso ditugu.

14. Zer da iragarki honetatik gehien gustatu zaizuna?

26 erantzun jaso ditugu.

15. Eta zer ordea gutxien gustatu zaizuna?

24 erantzun jaso ditugu. Erantzun irekian erantzun dutenek, txarrena iragartzeko beste formarik aurkitu ez dutela, eta parkearen ambientazioa behar bezala explotatzen ez dela esan dute.

Emaitzak interpretatuz

Erantzun hauetatik hainbat ondorio atera ditzakegu. Gogorapenari dagokionez, %89,66-ak gogoratu du Port Aventuraren iragarkia, hori bai, honetarako lau galdera laguntzaile egin behar izan dira. Lehen galderan, non ikusitako bost iragarki aipatzea eskatzen zen, soilik hiruk aipatu dute Port Aventura. Bigarrenean, aisialdirako parkeen inguruko galdeketa zela adierazi dugu, eta 13 pertsonek gogoratu dute. Hirugarren galderan, inkestatuak irudi laguntzaile batzuk izan ditu eskura, eta % 64, 52ak Port Aventurarekin lotu ditu. Azken galderan ordea, %89,66 izan da gai iragarkia Port Aventurarekin parekatzeko.

Memoria bisuala nahiko ona izanda, iragarkiaren sloganaren inguruan galdetu dugu. Laguntzarik gabe, ea slogana ezagutzen zuten galdetzean, bi pertsonak egoki asmatu dute. Slogan posibleak eskainiz gero, %30-a ez da gai izan gogoratzeko, eta bestalde, % 27,7ak erantzun desegokia aukeratu du. Soilik % 27,7ak asmatu du slogan erreala.

Inkestatuen 96,67ak bisitatu du gutxienez behin Port Aventura, eta iragarki honez geroztik, nahiko gogo piztu zaie bertara joateko, izan ere, 10ek 4ko puntuazioa eman diote baieztapen honi (1-5erako rangoan) eta 9k balorazio neutroa eman diote. Gainera, iragarkia ikusi ondoren, %62,07ak planteatu egin dio bere buruari Port Aventurara bidaia egitea.

Iragarkiaren inguruan, %65,8ak erantzun neutro bat eman du sinesgarritasunaren inguruan galdetu diegunean, iragarki nahiko sinesgarria dela esanez. Segidan, inkestatuen 19,23a dugu zeinek ez duten uste iragarki sinesgarria denik. Soilik %14ak uste du iragarkia oso sinesgarria dela. Bestalde, iragarkiari adjektiboak txertatzean, orokorrean arreta deitzen duen iragarki erakargarria dela iritzi dute. Hala ere, % 13,33ak aspergarria dela dio eta soilik % 5ak dio pertsuasiboa dela.

Honez gain, esan dezakegu iragarkiak ez duela eraginik suposatu inkestatuek parkearekiko zuten aurretiko iritzian. %84,62ak dioenez, iragarkiak errespetatzen du Port Aventurarengan zuten iritzi hori, eta soilik %15,38arentzat aldatu da hobera.

Azkenik, batez ere iragarkiaren dinamismoa, erabilitako estetika eta efektu bereziak baloratu dira, eta gutxien gustatu zaiena pertsonaiak eta musika izan dira. Hala ere, parkearen anbientazioa behar bezala esplotatzen ez dela edo beste iragartzeko modurik aurkitu ez dela ere iritzi dute inkestatuek.

Erantzun guztiak baloratuta, esan dezakegu Port Aventuraren kanpaina berrirako kaleratutako spotak nahiko eragin izan duela gizartean. Gogorapen maila altua erakutsi da, non gainera, egunean jasotako inpultso publizitario anitzak kontutan izanda, hiru pertsonek Port Aventura aipatu dutela besterik gabe. Slogana gogoratzeko orduan ordea, arazo handiagoa dago, laurdenak gogoratu duelako, eta laguntzarekin gainera. Beraz, esan dezakegu kontsumitzaileak iragarkiaren irudiak memorizatu dituela luzerako, ez ordea sloganaren mezua.

Bestalde, iragarkiarenganako balorazio orokor bat egitearren, spot sinesgarria dela nabari dugu emaitzen arabera, arreta deitzen duen iragarki erakargarria. Ordea, badago aspertu egin den taldea ere, eta oso gutxi sentitu dira pertsuadituta. Estiloari dagokionez, dinamismoa, estetika eta efektu bereziak positiboki baloratu dira, eta pertsonaiak zein musika ez dira gustuko izan. Gainera, anbientazio eskasari kritika egin zaio.

Azkenik, inkestatu ia guztiak egon dira parkean, eta orokorrean gogoa eman die iragarkiak bertara bueltatzeko, erdia baino gehiagok gainera, planteatu egin dio bere buruari bidaia posible hori. Gainera, Port Aventurarekiko zuten iritzia mantendu du spotak, eta gutxi batzuengan hobekuntza suposatu du.

Balorazio orokor bezala, kanpaina eraginkorra dela uste dugu emaitzak oso positiboak izan baitira, eta agian, mezuan gehiago zentratzea gomendatuko genuke.

Hil egin zaitut

2010-05-23T01:34:00.006+02:00

Berriz ere. Ez dakit entsaladako tomatea edo zer demontre izango den, baina azken bolada honetan hil eta hil ari naiz. Aurrekoan burua moztu nizun, eta oraindik bizirik zeundela, barkatu egin zenidan. Baina gaur ere zurekin akabatu dut eta oraingoan sufritu egin duzu, bai, mina egin dizut zure begietan sua ikusi dudan arte. Eta orduan zerbaitek eztanda egin du nire barrualdean, bular aldean. Eta burura igo zait su artifizial bat bailitzan. Klimax-a.

Haurdunaldi traumatikoa-> Pauloven txakurraren asoziazio sintoma-> Sistema immunitario defizientea-> Tomatea jan ezina-> Bihotz errea-> Gau astunak-> hil-ke-ta o-dol-tsu-ak.

Ametsetan transformatu egiten naiz, eta ez dut nire burua ezagutzen. Ezta kontrolatzen ere.

Ba al dago hau baino iragarki eraginkorragorik? (Bromatxoa)

2010-05-22T21:11:00.003+02:00

Hauxe da datorren urteko Eraginkortasuna sarietara aurkeztu beharko litzateken iragarkia. Eta aurkezteaz gain, urrezko saria irabaziko luke, inongo dudarik gabe. Orain ulertu daiteke zergaitik sortzen diren karabana kilometriko horiek Aranjuezeko A-4 an. Bejondeizula Maria, baduzu tartetxo bat jada publizitatearen historian.

PD: Guzti hau broma txarra besterik ez da. Norbaiten sentiberatasuna iraindu badut, salatu nazala.

PD2: Azalduko al dit norbaitek zer demontre iradoki nahi duen komun bat erakustearekin? :S

5. Ariketa: Gogoratzen al duzu....?

2010-05-22T18:21:00.013+02:00

Lehenbizi, nire kidea aurkeztu behar dut. Zuekin Iosu Ganuza Atarrabiatarra (eskubiko tipo xelebrea). Ondoren, ariketaren xedea ezagutarazi. Post-test bat, publizitate kontsumitzaileek iragarki batenganako duten gogoramen maila, alegia. Iker-iragarkia zein? Ba, Port Aventurak aurtengo denboraldirako egin duen kanpaina, amak esango lukeen lez, "cada loco con su tema". Beraz, honelaxe planteatu dugu ariketa:

PORT AVENTURA 2010: vive el momento

Iragarkiaren azterketa:

Produktua: Port Aventura parke tematikoa
Iraupena: 30 segundo
Kanpainaren hasiera: Martxoak 15
Slogana: vive el momento
Komunikazio mezua: etor zaitez, eta disfrutatu
Kanpainaren helburua: posizioa mantentzea gogorapen iragarki batekin.
Arlo kreatiboa: Argazki panoramiko izoztuen bideomuntaia parkearen inguruak erakutsiz. Guztira 150 pertsona agertzen dira Xede-taldeko kide ezberdinak erakusten dira.
Medioak:Espainiar kate nazional nagusietan, kate tematikoetan, autonomikoetan, interneteko bannerretan, opietan, autobusetan, hesietan, eta irratian.

Emozioen mundua da Port Aventura parke tematikoaren tenporada berriaren kanpainaren ardatza, eta telebistan dago ikusgai martxoaren 26tik aurrera. “Bizi momentua” ideiatik abiatuta, telebistarako kanpainak bisitarien erreakzioen irudi errealak erakusten ditu. Puntako teknologia erabili da spot-a filmatzeko eta elementu tekniko ezberdinak konbinatuz, 150 pertsonaren irudi izoztuak sortu dira parkean bizitzen ari diren momentuak islatuz: Furius Bacoren abiadura, Txinako plazan ohikoak diren ikuskizun itzelak, Polynesiako suaren indarra edo Tutuki Splash-en azken ur-eztanda.

Guzti honetarako, teknika ezberdinak erabili dira, aurrerago azaldu dugun lez:

-Abiadura biziko Phantom kamera segundoko 1000 fotogramako abiaduran, errusiar mendi azkarrenen irudi garbiak lortzeko.

- Multikamera sistemak momentu bera 50 angelu ezberdinetatik lortzeko balio izan duenak, honela hiru dimentsiotako irudi izoztu horiek sortuz.

- Atzealdeak sortzeko argazkiak

-Zinemarako 35mm-ko kamerak barraketan jarrita eta Red One-ak travelling-en zirkularren gainean pertsonaiak inguratu eta izitu birtualak lortzeko.

Filmaketak bi egun eta erdi iraun zuen eta parkean bertan filmatu zen. 50 tekniko eta 100 figurante baino gehiago joan ziren bertara, parkeko bertako beste 50 langilez gain. Post-produkzio lanak bi hilabetez luzatu dira eta sua edo ura bezalako efektuak txertatu zaizkie irudiei, espektakularitate hori emanez.

Grey-ren kanpaina hau Espainiako telebista kate pribatu nagusiek emitituko dute (Antena 3, Tele5, Cuatro, LaSexta), baita kate tematiko eta autonomikoetan ere. Honez gain, kanpo publizitateaz, interneteko bannerrez, irrati kuñez eta autobusetako publizitateaz ere hornituko da telebista bidez eginiko kanpaina.

Port Aventurak, Espainiako lehen parke tematikoak, 15 urte betetzen ditu aurten, eta 1995eko maiatzaren 1ean ateak zabalduz geroztik, 50 milioi pertsonek gozatu dute bertako jolasez.

Xede taldea finkatuz:

Iragarkiaren publikoa zehazteko ez dugu informazio hori emango zigun kanpo iturririk erabili, izan ere, ez dago azterketa zehatz bat aurrekoa ahalbidetuko diguna. Ordea, gure iritzian eta usteetan oinarrituta, xede taldera hurbiltzen den populazioa finkatu dezakegu:

Xede taldea: Ume zein familia espainiarrak:

Klase Soziala: Klase sozial ertain-ertaina/ertain-altua

Adin tartea: 12-16/17-29/30-50

Segmentazioak
-12-16 urte bitarteko umeak, familiaren dependentzia dute bidaiatzeko. Gurasoak eragingo dituzte.
-17-29 urte bitarteko gazteak, beraien kabuz joan daitezke parkera
-30-50 urte bitarteko gurasoak, beti ere famili nagusiak badira seme alabekin.
-35-50 urteko helduak, maila murritzagoan.

Gunearen arabera: maila berdinean Espainian bizi diren guztiak.

Ikerketaren araberako datuak:

Ikerketaren targeta: 17-50 urte bitarteko gazte eta helduak, beraien kabuz modu zuzenean parkean inbertsioa egin dezaketenak. Gizon zein emakumeak erabiliko ditugu maila berean, ez dugu sexu-diskriminaziorik egingo. Berebiziko garrantzia emango diogu 20-50 urte bitarteko iker-taldeari, maila nagusi batean beraiek mantentzen dutelako parkearen funtzionamendu ekonomikoa.

Kide hauek, klase sozial ertain-ertain/ertain-altukoak izango dira, eta 20-50 urte bitartekoak bizitza laboral aktiboa izango dute, kasu batzuetan familia ere. Honen arrazoia da adin nagusiko taldekoek ez dutela parkea iniziatiba propioz bisitatzen, ez behintzat batazbesteko datuetan. Haatik, familiak nagusitzen dira hemen, umeak dituztenak, bi seme-alaba edo gehiago dituztenak, alegia.

Ikerketaren helburuak:

-Iragarkiarekiko atitude orokorra zehaztea

-Iragarkiaren gogoraratze indizea zehaztea (gogoratu duten kide kopurua, mezuaren gogoraratzea)

-Iragarkiak kideengan izan duen eragina (hartzailearen jokabidearen aldaketa posiblearen azterketa)

-Kideen iragarkiarekiko identifikazioa

Guzti hau galdetu nahi dugu, lehenbizi, iragarkiari atentzioa ipini dioten edo ez jakiteko. Komenigarria litzateke eraginkortasuna neurtzerako orduan, ea jokaera aldaketarik suposatu duen. Port Aventuraren aldeko jokaera aldaketa bultzatu bada, iragarkia eraginkorra izango da. Hala ere, enpresaren izenaren notorietatea eta prestigioa mantentzen edota igotzen laguntzen badu, helburu komunikatiboak ere lortuko lirateke, merkatu helburuez gain.

Inkesta diseinatzen

Post-testa encuestafacil.com web gunearen bitartez egingo dugu, emaitzak modu erraz batean kudeatzeko aukera eskaintzen baitu. Bestalde, Facebook, Tuenti eta Face to Face bidez helaraziko dugu post-testa, beti ere inkestatuak finkaturiko perfilaren barruan daudela ziurtatuz. Besterik gabe, jarraian aurkezten dugu inkesta, eta HEMEN, sarean eskegi dugun bertsioa topa dezakezue.

PUBLIZITATE KANPAINA BATEN POST-TESTA

Hartu ezazu parte gure inkestan Mesedez, eskainiguzu momentu bat publizitatearen inkesta hau betetzeko. Zure erantzunak konfidentziaz tratatuko dira eta ez dira Hel&N-ek sortutako inkesta honez gain beste edozein helburutarako erabiliko. Inkesta honek 15 minutuko iraupena du, gutxi gora-behera.

Gogorapen maila
1. Esango al zenizkidake aste honetan ikusi dituzun bost iragarki?
1.
2.
3.
4.
5.

2. Ikusi al duzu Aisialdietarako parkeen inguruko iragarkirik?
Zein? (Erantzuna egokia baldi bada, pasa 5. Galderara)

Mesedez, ikusi itzazu telebistan azaldutako iragarki honen irudiak:

3. Gogoratzen al duzu zein iragarkiri dagozkien irudiak? (baietz erantzun baduzu pasa zaitez 5. galderara)
Bai
Ez

4. Irudi hauek aisialdirako gune famatu bat iragartzen dute. Zein?
Marina dor
Port Aventura
Terra Mitica
Isla Magica
Disneyland
Senda Viva
Besterik?

5. Gogoratzen al duzu zein den iragarki honen slogana?

6. Gai izango zinateke emandako aukeretatik iragarkiari dagokion slogana identifikatzen?
Ven a Port Aventura
Vive el momento
Pensando en ti
Diviértete con nosotros
Unete a la corriente de la diversión
Ez dut gogoratzen

Ustiapen intentzioa

7. Egon al zara noizbait Port Aventuran?
Bai
Ez

8. Balora ezazu 1etik 5era Port Aventurako iragarkia ikusita piztu dizun joateko gogoa:
Zure balorazioa (1 gutxi 5 asko)
1
2
3
4
5

9. Iragarki hau ikusi eta gero, planteatu diozu zure buruari bertara bidaia egitea? Ikusi ez baduzu, planteatuko zenuke?
Bai
Ez
Zergatik?

Iragarkiarekiko atitudea

10. Baloratu iragarkiaren sinesgarritasuna.
Ez da sinesgarria
Sinesgarritasun gutxi du
Nahiko sinesgarria da
Oso sinesgarria da
Erabat sinesgarria da

11. Hemengo zein adjetiborekin definituko zenuke iragarkia? Zeintzuekin?
Erakargarria
Arreta deitzen du
Aspergarria
Argoa
Besterik gabekoa
Persuasiboa
Sortzailea
Liluragarria
Egiazkorra
Gogaikarria
Gustu txarrekoa
Erdipurdikoa
Errealista
Errepikakorra
Betikoa
Argia
Informatiboa
Ez litzaidake berriz ikustea inportako
Besterik?

12. Port Aventurarekiko zenuen irudia errespetatzen du iragarkiak?
Bai
Ez. Zergatik?

13. Nola aldatu du iragarkiak Port Aventurarekiko zenuen kontzeptua?
Hobera aldatu du
Ez du inolako aldaketarik suposatu
Txarrera aldatu du
Gauza batzuk onera eta beste batzuk txarrera aldatu ditu. Gauza hauek:

14. Zer da iragarki honetatik gehien gustatu zaizuna?
Kontatzen dena
Efektu berezia
Erabilitako estetika
Dinamismoa
Musika
Pertsonaiak
Pertsonaia famatuen agerpena
Besterik. Zer?

15. Eta zer da iragarki honetatik gutxien gustatu zaizuna?
Kontatzen dena
Efektu berezia
Erabilitako estetika
Dinamismoa
Musika
Pertsonaiak
Pertsonaia famatuen agerpena
Besterik?

Zure inguruan

Galdeketa amaitzear dago. Azken galdera hauek, ikerketaren erantzunak egokiago ikertzeko baliko dizkigute. Gogoratu eskainitako datuak soilik ikerketa honetarako erabiliko direla, eta behin helburuak lortuta, ez dira inon artxibatuko.

16. Sexua:

17. Adina:

Amaitu da galdeketa
Mila esker parte hartzeagatik!

Tabú

2010-04-01T20:38:00.006+02:00

Behingoz lo hartzen duenerako, ez zaizkio ezta sei ordutxo ere gelditzen amestearen plazerraz gozatzeko. Azken aldian, gainera, deseroso esnatu ohi da, gau osoa Kill Bill-eko neska ilehoriarekin katana-borrokan aritu balitz bezala. Deseroso baino, nekatuta. Egunean zehar, ondorioz, burbuila batean aislaturik, pentsatzeari ekiten dio testuingurua edozein delarik: Kalean, autobusean, klasean... Batez ere klasean, zoritxarrez.

Laginketa aleatorio sistematikoaren inguruko informazioak ozta-ozta lortzen zuen burbuila traspasatu eta bere adimenean tartetxoa lortzea, eta tamalez, azkenean espero zena gertatu zen. Des-ko-ne-xi-o-a.
Atentzioaren koma sakona. Eta berriz ere Alemaniara bidai sideral imaginarioa.

Nostalgia, batzuetan, jostorratz-bainua baino mingarriagoa da. Neuronak masakratuko nituzke Blue Fire-n behin eta berriz igoz. Eta kotxe hura hartuko nuke nahiz eta ez dakidan martxan jartzen ere. Eta gofre antzeko opiltxo hori ere... Ras! Barrura. Txokolate eta nataz. Ekar ezazu zurea ere, ez zaizu gustatuko eta. Gauez herritxo isil hartara joango ginateke, eta oraingoan, iluntasunera sartzeko adorea izango nuke eta zu nirekin! Salbatu egingo nizuke lurrera jauztean, eta ez zinateke bustiko.

Askotan pentsatzen dut oso zoritxarrekoak garela lehen aldiz bizitakoak berriz ere errepikatuko ez direlako. Denbora aurrera doan heinean, geroz eta lehen-aldi gutxiago biziko ditugu. Eta helduko da egunen bat noiz dena egina izango dugun, behintzat behin. Dena nostalgikoa izango da, eta naiz eta errepikatzeko ahalegina egin, sinetsidazu lagun, ez da izan zenaren itzala ere izango. Nik diot, nostalgian bizi baino, nahiago olatu batek irensten banau.

Ametsetan ordea, dena da posible. Berriz ere lehen aldiz sentitzea ere bai.

4. Ariketa: and the winner is...

2010-03-31T15:23:00.018+02:00

Etxera heldu bezain laster, betiko errutinari ekin diot: MP3-a itzali, bazkaltzeko zer dagoen ikusi, disgustoak eragindako tripakomin efimeroa sufritu (lentejak) eta , azkenik, ordenagailua piztu. Gero Tuenti-n sartu naiz, baina ezer gutxi, argazki baten bizpahiru iruzkin eta ekitaldi baterako gonbidapena Kantzerraren inguruan egindako spot sentikorra erakusteko helburuarekin. Dirudienez, sari asko jasotako iragarkia da, alde kreatibo handia duelako edo.

Guzti honek klasean ikusitako Efikazia sariak ekarri dizkit burura. Izan ere, publizitatea saritzen duten ekitaldiek ez dute ohiartzun esanguratsurik, ez behintzat zine edota musika "ona" errekonozitzen duten zeremoniek bezain beste. Hala ere, interneten bilatuz gero, horrelako asko existitzen direla ikusi dut, eta publizista izatea nahi duen pupiloa naizen heinean, apur bat lotsatu naiz hauetako bat bera ere ez ezagutzen ez nuelako. Beraz, kontzientzia garbitzeko edo, informazio bila hasi naiz.

Publizitatearen kreatibitatea saritzen duten ekitaldi asko antolatzen dira munduan zehar: Hego Amerikan Sol sariak ditugu, eta, garrantzi handikoa da ere -garrantzitsuena agian, nazioarte mailakoa baita-, Cannes Lions jaialdia. Azken finean, agentzien sormen lana saritzen da, iragarki deigarriak, dibertigarri eta entretenigarrienak, aurrerago erakutsitako bideoa bezalako sentikorrak direnak.

Baina, aizu! Non gelditu da publizitatearen benetako funtsa? Sari horiek kreatibitatea dute aztergai, hala ere, ezin dugu ahaztu guzti honen azken helburua iragarleari mesede egitea dela. Publizitatea ez da 30 segunduko bideo "kuttun" soila, ikerketa eta azterketa prozesu izugarria ezkutatzen da spot horien guztien atzean. Dirua inbertitzen da diru gehiago lortzeko, estrategiak antolatzen dira jendeak gure produktua eros dezan. Nork saritzen du guzti hau, ordea? Ba, Efikazia sariek, aurrerago esan bezala.

Efikazia edo eraginkortasun sariak -Premios Eficacia, bere izen originalean-, 1997. urtean sortu ziren, publizitate komunikazioak iragarleen eta enpresa munduan duen pisuaren errekonozimendu falta hori ekiditeko. Iragarleek antolatzen dituzte (Iragarleen erakunde Espainiarrak) beraiek zein agentziek egindako lan ona saritzeko helburuarekin. Beraz, esan bezala, ez dira kreatibitatean soilik zentratzen, lortutako emaitzak, notorietateak zein salmenten areagotzeak eta lortutako beste motako errentagarritasunak ere haintzat hartzen dira. Azken finean, efikazia da publizitatearen ardatza.

Ordea, ez dut hainbeste ezberdintasun aurkitzen jaialdi honen eta kreatibitatea abiapuntutzat hartzen duten ekitaldien artean. Egia da, bai, Efikazia sariek hobeto biltzen dutela publizitate eta komunikazioaren filosofia erreala, baina azken finean espektakulo hauek agentzien eta iragarleen ohiartzun mediatiko positiboa bilatzen dute (positiboa diot, ondo egindako lana saritzen delako, ez urteko porrot finantziero handiena). Nire aburuz, sari hauek, balorazio-objektua edonolakoa izanda, publizitatearen publizitate dira; Stanley Bendelac epaimaiko kideak dioen lez, "sariak onuragarriak dira iragarleentzat, eta, azken finean, gure ogibidea horretan oinarritzen da".

Alde positiboa ere badute sariek, ondo eginikoa ezin hobeto datorkigulako ikasten ari garenoi, batez ere orain, Sistema eta prozesuen ikasgairako komunikazio plan bat egin behar eta masa-suizidio bat antolatzeko gutxi falta zaigularik. Bromak alde batera utzita, Efikazia sarien beste altxor bat, urte ezberdinetako irabazleen marketing eta komunikazio estrategiak batzen dituen liburua da. Helburuak, jorratutako bide kreatiboaren azalpena eta agentzia zein iragarlearen fitxa teknikoak eskaintzen ditu.

Ekonomiaren munduan pixka bat murgiltzearren, interesgarria litzateke inbertsio-konparazio/balorazio bat egitea, hau da, 2009an publizitatean gehien gastatu duten 20 iragarleen zerrenda hartu, eta Eraginkortasun handiena izan dutenekin alderatu (Efikazia sarien irabazleak direnak, noski).
Irudian ikusi daitekeenez (ez bada argitasun nahikoaz ikusten, zabaldu irudia bertan klik eginez, edo bisitatu iturri originalak: Infoadex eta Efikazia sarien irabazleen zerrenda), asko inbertitzeak ez du eraginkortasun handia bermatzen, izan ere, 20 iragarle xahutzaileen artetik, soilik hiruk jaso dute Efikazia Sari printzipala. Alde batetik, Linea Directa Aseguradora dugu, rankinean 16. inbertsore bezala eta sarietan Urrea eskuratu duena; ondoren Telefonica, guztien artean gehien inbertitu duena eta zilarrezko dominarekin konformatu behar izan dena; eta azkenik Coca Colak ere jaso du bere lanaren errekonozimendua (hirugarrena podiumean), 35, 2 milioi euro publizitatean gastatu ondoren.

Bukatzeko, Ignazio fernandez Simal BMW group Iberica-ko zuzendariak esandako hitzak ekarriko ditut ariketaren sintesi gisa: "Efikazia sariek balioa ematen diote gure ogibide eta jorratutako lanari (...), kulturaren sustatzaile dira, hezi egiten dute eta ikasle zein profesionalen formakuntzan berebiziko garrantzia dute". Hauxe horrela izanda, datorren edizioaren zain egon beharko dugu!

Ah! Ezin naiteke joan aurki irabazlea den IKEAren spot-a eskegi gabe, guzti honen ondoren, barkaezina litzateke. Ziur guztiori ezaguna egingo zaizuela.

Ez nago batere pozik nire ohearen kokalekuarekin.

2010-03-15T23:55:00.005+01:00

Demonio. Mugikorra mesanotxean utzi nuen bart eta besoa luzatuz gero esnatu egingo dut. Hobe mugitzen ez banaiz, ostantzean batek daki, agian berriz ere zurrunkan hasiko da. Eta zurrunkan hasten bada, ni suizidatu egingo naiz. Ze ordu izango da.... Goizeko bostak? Seiak? Kotxeen zaratarik ez dago kalean. Bai bostak inguru. Ba, ni jada aspertu naiz hemen egoteaz. Salara joango nintzateke, ez dakit, telesail bat edo ikustera. Baina goizeko bostak izanda nola demontre joango naiz salara! Benga, itxi begiak eta egizu lo.

Izara. Guztiak. Kendu... Dizkit. Ya. Listo. Parra. Gero katarroa harrapatu duela esango dit, nire logela hotza dela eta eztarria urratu zaiola. Lotsarik ez du honek! Hotza baino bart erretako hiru porroak kontsideratuko nituzke nik bere eztarri-arazoen errudun, hotzez, kasu, ni hilko naiz eta ez bera. Non dago erdiko manta? Galdu da hor behean nonbait. Kaka.

Metro bat eta hirurogeita bederatzi zentimetro neurtzeko, harrigarria da zenbat okupatzen duen! Txoritxo baten pareko tamaina du eta ni ezin naiz mugitu ere egin. Baina tira, nahiago momia baten pare gaua pasatzea, bakarrik lo egitea baino. Ezin naiz berarekin haserretu, nola haserretuko naiz, ba, horrelako aurpegitxoa duen aingerutxoarekin? Batzuetan gorroto dut, baina ezin diot ezer ukatu. Ezetz esateko gutxira izan nintzen atzo, hala ere, bere beharra nuen eta etortzeko esan nion. Bihar hobeto egongo naiz eta ez zait horrenbeste kostako.... bai, bihar laranja zukua prestatuko diot. Bihar edo gero, joder, ze ordu da? Besoa luzatuko dut mugikorra hartzeko eta esnatzen bada, esnatu da eta hor konpon.

-Barkatu, esnatu egin zaitut.
-Maite zaitut.
-Nik ere maite zaitut. Egizu lo.
-Bai. Maite zaitut.

05: 46. Banioen ba nik.

Lasai, oraindik ez da iritsi munduaren amaiera.

2010-03-10T11:52:00.007+01:00

Denbora luzez buruari hainbat bira eman ondoren, ondorio garbi, ukaezin eta gordinera heldu nintzen:

2012. urtean, mundua amaituko da.

Hilabete bakarrean hiru lurrikarek astindu dute gure planeta, lehena Haitin, ondoren Chile eta duela pare bat egun patu berdina jasan zuten Turkiako biztanleek. Bestalde, nonbait hor behean, antartida aldean, Tenerife irla kanariarraren antzeko tamaina duen mega-izeberg batek, gainontzeko izotz masari agur esan eta bere kaxara noraezean aritzeko independentzia lortu duenak, itsas-uhaitzen norabidea aldatu du; eta honek izugarrizko arazo meteorologikoak dakartza, dirudienez.

Noski, akojonatu egin naiz. Klasean, badaezpada ere, planetaren egoeraren jakinean jarri ditut hainbat ikasle: 2012. urtean, Mayen munduaren amaieraren predikzioa bete egingo da eta guztiok hilko gara, nahi edo ez. Batzuek Tuenti bidez masa-suizidio bat antolatzeko ideia proposatu dute, beste askok portatila zabaldu eta Vueling-en beraien ametsetako bidaiaren bila hasi dira. A.M.-ek, urduri, bere existentziaren amaiera gertu dagoela ikusirik, A.F.-ri maitasun deklarazio sutsua egin dio eta erantzuna baiezkoa izan da. Desesperazio momentu hauetan denak balio du, ikusi daitekeenez.

Baina agian, Telecinco-ko kazetariengan arrunta den bekatu berbera egin dut nik ere: ez dut informazioa kontrastatu. Beraz, Google-en sartu eta honen inguruan dokumentazio lan garrantzitsua egin dut, Teresa Agirreazaldegik bere ikasgaian erakutsitako tresneria itzela erabiliaz. Antza, 2012. urtean egutegi Mayaren bukaera izango da, beste periodo berri bati hasiera emango zaiolarik, 13. Baktun-a, izenez. Ez uholderik, ezta Tsunami masiborik ere, ez behintzat profezia honen erruz.

Beraz, harturiko lasaitasuna ez da izan edonolakoa, putada itzela litzateke karrera amaitu bezain laster, zas! Olatu erraldoi batek dena kakatara bidaltzea.

Izua eragiteak plazerra ematen dit. Eta hauxe dela eta, Eiken BANK-ek antolatu duen Euskal talentuen lehiaketan parte hartzea erabaki dut. Ikus-entzuneko ideien lehiaketa da, filme baten, telesail baten zein mugikorraren bidez ikusteko laburmetrai baten ideien lehiaketa, beste asko posible izanik. Izua sortuko duen zerbaiten bila nabil, gaur egun horrelako asko ez dagoelako.

Tipo honek, adibidez, benetan sentitu du gure klasekideok aurki sentitu duguna, munduaren amaieraren kontu honen inguruan. Eta horrelako zerbait sortzea da, beraz, nire erronka.

Itzalak bitan banatzen du bere aurpegia

2010-03-08T00:57:00.006+01:00

"Edaten ez badakizu, utzi behingoz edateari". Eta kasu egingo diola zin egin du, bihotzez. Izan ere, itzalak eztaltzen du bere aurpegiaren zati bat, baita gauez ere, bai, batez ere gauez. Eta vodka Red Bull pareak gibela inbaditzeko estrategia antolatzen duen momentu horietan, Larunbat gauetan, are gehiago. Zine Beltzeko Femme fatale-n antzera, aurpegi bat, izaera bi.

Edateari utziko dio, hala ere, badaki gauzak ez direla hain errazak. Mutila maite du baina min egin dio nahi gabe. Berriz ere. Ezin du itzaletik ihes egin. Mutila maite du baina beldur dio, eta alkoholaren kontua bigarren mailako aitzakia tentela da, umekeria. Garai batean, benetan pertsona ona zela sinistu zuen. Uste zuen erruduna mutila zela, bera ordea, arrazoiaren jabe. Baina mutilaren aupegia bere osotasunean antzeman zitekeen bitartean, bereak alde ilun bat zuen, partzialki.

"Ez zara dirudizuna, kabroia. Ez zara ona, ustelduta zaude. Koldarra zara eta sines nazazu, zurekin ez naiz deus ere zoriontsu izango. Ezin dut zugan konfidantza izan". Orduantxe konturatu zen ez zela ona, etzeukala arrazoirik. Bere irudi ideal fiktizioak irentsi zuen jada urte batzuk aurrerago, eta orain segika doakio momentu oro. Ez da, inolaz ere, izatea nahiko lukeen tipo hura, aitzitik, gezurtia da. Eta deabrua ere bada gezurtia, eta itzalak bitan banatzen du bere aurpegia.

Gaur min egin dio. Eta konturatu da, beste behin, ezingo dela behar bezain adoretsu izan, itzalak alde argiztatuko begia irentsi baitio, minbizia gorputzetik zabaldu ohi den lez. Soilik mutilaren zoriontasuna desio du, beraz, edateari uzteaz gain, xake partida honetan ere errenditu egingo da. Zuk irabazi duzu, eztal ezazu behingoz nire aurpegia. Baina libra ezazu mutila bere minez, nik jada galdu dut eta.

Life is Precious

2010-03-07T17:35:00.003+01:00

"La vida cobra sentido cuando se hace de ella una aspiración a no renunciar a nada"
José Ortega y Gasset

Europa Park-eko bidaiaren bideo oroigarria

2010-03-05T18:36:00.009+01:00

Aurki bukatu den urteko Irailean egin genuen Alemaniara bidaia, parke tematikoen amorratua naizenez, Europako honenean astetxo bat pasatzeko oparia egin zidan Ibaiek. Indioen herrixka batean inspiratuta zegoen resort batean egin genuen lo, benetako Tipietan (hori bai, gureak kalefazioa zeukan, Iraila zen arren tenperatura -3 gradutara jaisten zelako gauez). Milaka anekdota eta momentu politez gogoratzen dugu herrialde germaniarrera eginiko bisita, eta noizbait itzuliko ginen promesa ere egin genuen. Ez naiz oso trebea bideo-muntaiak egiten, baina orogarritxoa besterik ez da hurren aurkezten dudan bideoa, bertan grabatutako eszenak erakusten dituena.

PD: "ay por favor-ak" kendu ditxut :P ulertu bihar dabenak ulertuko dau.

3. Ariketa: Facebook-eko esperimentuaren emaitzak

2010-03-05T13:12:00.018+01:00

Aste bat pasata, heldu da garaia Facebook-erako pertsonai sekretuaren identitatea ezagutarazteko momentua! Jose Gomez Sodupe gaitzizenaz "batailatu" nuen tipo "katxarroa", Jose, nire anaia Josuren omenez, Gomez, azken honen bigarren abizena prestatuta hartuz, eta Sodupe, nire laugarren abizena delako. Behin izena aukeratuta, aurpegi erakargarri baten bilaketari ekin nion sare-sozialetako nire lagunen lagunak arakatuz. Hala ere, ilegala zen zerbait egiten ari nintzelako sentsazioak inbaditu ninduen, beraz, Google Imagenes erabiltzeko erabakiak kontzientzia lasaitzea balioko zuelakoan, bide horretatik ekin nion bilaketa horri. "Chico guapo" tekleatu eta sinesgarria zen lehen tipoa aukeratu nuen, gero, Facebook-ean profileko argazki bezala jartzeko.

Behin profila eginda (honetarako email berria ere sortu nuen, bada ezpada ere), hurrengo txanpara nola salto egin erabaki behar izan nuen, zerotik hasita lagun asko modu azkarrean lortzea ez baita gauza erraza. Nire arreba konplize egin eta bere hotmail kontua prestatu zidan Facebook-ek eskaintzen duen "lagun bilaketa express" delakoa erabiliz, MSNko lagun guztiak -Facebook profildunak, noski- lagun bezala gehitzeko, guztiak kolpe bakarrean. Zergatik nire arrebarena eta ez nirea? Hamasei urte dituela esanda nahikoa litzateke aurrekoa ulertzeko. Gaur egungo gazteak (14-17 urte bitartean, eta geroz eta margen zabalagoarekin) Artxi-sozialak direlako. Honen froga da, metodologia hau erabiliaz, 150 bat lagun eskaera egin nituela. Nire lagun bilbotar batek esango lukeen bezala, AMAZING.

Behin eskaerak bidalita, beste lagun bati (hauxe ere bilbotarra), lagun izateko eskaera onartzeko eta bere Facebook-eko lagunei nire lagun izateko gomendioa bidaltzeko eskatu nion. Beraz, arratsalde berean 30 bat lagun eskaera jaso nituen, baita lauzpabost mezu pribatu ere nor nintzen galdezka. Sexua egitea ere eskaini zidan errealitatean ezagutzen dudan tipo batek eta jada ez dakit kapaz izango naizen orain arte bezala agurtzeko :P. Ikusi behar.

Egin nituen 150 eskaera horiei dagokienez, laurdenak edo onartu ninduen lagun bezala, eta inoren "presioa" jasan gabe sarean nire perfila modu espontaneoan deskubritu zuten batzuek ere badaude, gehienak Hego Amerikarrak. Guztira, 75 lagun astetxo bakar batean.

Egia esan, esperotakoa baino emaitza kaxkarragoa da hauxe. Ez dakit, egindako eskaera kopurua bikoiztea arruntena izango zela pentsatu nuen, eta hortik gora. Hala ere, argazki bakar batekin -orain ikusten dudanean, gainera, nahiko "irreala" dela iruditzen zait- eta beste ezerekin, agian, jendea ez da nik sortutako perfilaz fidatu. Profileko datuak emateaz gain, ez dut bestelakorik egin, ez argazki gehiago, ez estekak ezta aplikaziorik ere. Ordea, 75 ez da zenbaki makala, batez ere, lagun izateko eskaera onartu dutenek eskakizuna egin duen tipoa –hots, ni , tipo guapo baten azpian kamuflatuta- ezagutzen ez dutela kontutan hartzen badugu. Are gehiago, nola ez, nahi propioagatik nire laguna izatea nahi izan dutenak. Nahiz eta pertsonaren existentziaren inguruan tutik ere ez jakin, lagunen eskaera onartzeko joera dago, “ikerketaren” arabera, %50-ko kasutan.

Guzti honen ondorio nagusia zera da: Erakargarritasun minimo bat edota kuriositate apurtxoa eragiten duena onartzen dugu, inolako

filtrorik erabili gabe. Pasa gaitezen publizitate munduan erabiltzen den jergara; xede-taldea nik lagun bezala gehitutako 150 kideak izanik, erdiak erantzun du nik igorritako mezuari, eta gainera, xede-taldetik kanpo zeuden beste asko kolpatu ditut “marketin viralaren bidez” (lagun batek nire profila gomendatu die bere ezagunei, eta hauetako askok erantzun dute). Hauxe horrela izanda, zergatik ez da ba berdin gertatuko enpresa baten Facebook-eko orriarekin?

Kontutan izan behar da Facebook-eko erabiltzaileak beraien perfilera konektatzen direnean eskaeraren bat edo beste izatea espero dutela, beste hitz batzuetan esanda, norbaitek lagun eskaera bidali digun, mezuren bat erantzun digun edota beste motatako gomendio edo zale egiteko orriak bidali dizkigun begiratzen dugu sartu bezain laster. Horrelakoxeak izugarri gustatzen zaizkigu. Gure jarrera aktiboa da kasu honetan, eta bannerrekin edota beste motako publizitate “mimetizatuarekin” gertatzen ez den bezala, interes handiagoa jarriko diegu eskaera hauei. Mezuaren hedapena 1- memoria selektiboa 0.

Beraz, behin erabiltzailea gure enpresaren orria bisitatzeko eskaeraren aurrean dagoenean, zerbait erakargarria eskaini behar diogu, logo bat, mezu bat… Zerbait. Eta kasu askotan, soilik kuriositate hutsez zuzenean egiten dugu barrura nora sartzen ari garen jakin gabe. Gure terrenoan jolastuko dugu orain. Badugu atentzioa, orain ezin dugu besterik gabe hartzailea joaten utzi, zereginak eman behar dizkiogu, irudiak, estekak, bideoak… Eta sorte pixka batekin, bere lagunekin konpartituko du hauxe guztia. Beraz, ikusi da indar handiagoa lortzen dela lagun batek besteari gomendioa egiten dionean (esperimentuan ere antzera gertatu da), baina tabloietan presente egoteak ere erabiltzaile asko erakarri ditzake. Guzti hau nire iritzia da, esperientzia pertsonalean oinarrituta, agian, errealitatean modu ezberdinean funtzionatzen du sare-sozial hauen publizitate-fazetak.

Hala ere, ez dut uste kanpaina bat osorik bideratzeko tresna honena denik Facebook, ezta beste edonolako sare-soziala ere. Gehigarri ideala da, ordea. Are gehiago, normalean sare-sozialetako perfil enpresarial hauek beraien gunera zubia soilik ez dira, erabiltzaileak web orria bisita dezaten bilatzen da hauekin, baita izena sendotzea, presentzia areagotzea. Gainera, interneten publizitate “desenfadatuago” bat egiteko aukera dago, etikaren mugak apur bat zabaltzen dira Volkswagen Golf kotxearen iragarkiak erakusten duen bezala. Enpresaren alde “politikoki ez hain zuzena” erakusteko bide ezin hobea da, hauxe nahi izanez gero. Baina, berriz diot, normalean publizitatea egiteko bide hau osagarria dela iritzi dut, ez dut kanpaina osoa marketin virala edo sare-sozialak oinarrian dituena ezagutzen (klasean ikusitako bi adibideak ez ezik).

Besterik gabe, agurtu dezagun Jose Gomez, minutu batzuk barru ziber-espaziotik alde egingo duelako betirako. Pena bat, batez ere nire lagun bilbotarrarentzat.

Internet eta Publizitatearen inguruko blog interesgarria

2010-02-27T14:00:00.004+01:00

Klasean landu dugu aurki zein den marketinaren isla Interneten. Sarean surfeatzen ari nintzela, gaiarekin zer ikusia duen blog bat aurkitu dut, Internet, publizitatea eta bien arteko erlazioa gaitzat duena. Beraz, zuekin konpartitzea erabaki dut. Blogera sartzeko egin klik HEMEN.

2. Ariketa: Publizitatea eta sare-sozialak.

2010-02-26T17:33:00.011+01:00

1. Zatia: Gaiaren inguruko gogoeta.

Ukaezina da sare-sozialetan, eskaintzen dituzten baliabideak kontutan hartuz, marketina egiteko ahalegina badagoela. Tuenti eta Facebook-en erabiltzaile naiz eta sarritan jaso ditut erakunde edo enpresa ezberdinden lagun-eskaerak. Gogoan dut duela hilabete batzuk Fnac Bilbao-en eskaera jaso nuela eta sare-sozialeko nire lagun askok ere talde honekin bat eginda zeudenez, nik ere onartu nuen, baita begiradatxo bat bota ere, kuriositateak jota. Antzera egin nuen We think experience taldearekin ere, Bilboko gazteentzat sortutako club antzeko bat. Lagun eskaera onartu, gunea arakatu eta karteran dut dagoeneko nire bazkide txartela.

Tuentik, baita ere, ekitaldien bidez hainbat marketing ekintza egitea ahalbidetzen du. Aurrerago aipatutako Fnac eta We think experience taldeek adibidez, beraien eskaintza eta notiziak bidaltzen dizkidate “evento” delako horien bidez. Baina ez soilik horrela, lagunen batek web gune zein edozer gauza interesgarria aurkitu badu, sarean guztiekin elkarbanatu dezake modu honetan. Hau ez litzateke enpresa horien iniziatiba, baina marketing ekintza eman da berdin-berdin. Honen adibide da azken aldian askotan jaso dudan “Colabora con Haití” deituriko ekitaldia, non web gunearen helbidea eskaintzen den bertan diru-laguntzak onartzen direlako (aipatu behar dut ezer baino lehenago, hauxe idazten ari naizela Red Bull-en bideo patrozinatu bat zabaldu zaidala tuentiko hasiera orrialdean, bapatean, ezer klikatu gabe. Kasualitatea).

Izan ere, oraintxe gertatu zaidan bezalaxe, patrozinatutako hainbat markaren publizitatea jasotzen dugu Tuentiko erabiltzaileek. E-mail zuzenbidea eta pasahitza sartu ondoren, hasierako orrialdea kargatzen den bitartean ere Mixta-ren (Mahou-ren limoizko garagardoa, oker ez banago) logotipoa ikusi daiteke batzuetan, adibidetxo bat ematearren. Eta beste batzuetan, Red Bull-ena bezala, bestelako bideoak agertzen dira ezerezetik. MSN-rekin ere berdin gertatzen da, baina kasu honetan molestu izatera iritsi daitezke iragarki hauetako askok soinua dutelako eta ezin direlako bertatik kendu.

MSNren kasuan, bestalde, interaktibitatea ahalbidetzen da, alde batetik jolasteko aukera ematen duten aplikazioak eskaintzen dituelako: “Egizu klik botoi honetan eta irabazi ezazu zure aurkaria” zihoen aplikazioetako batek, erabiltzailea sokasalto karrera sentsual batean parte hartzera gonbidatzen zelarik ondoren telefono mugikorren web batera teletransportatzeko, beti ere karrera irabaziz gero, noski. Windows Live-ren “Hoy” leihotxoak - messengerra zabaltzean azaltzen zaiguna, Hotmail postaren azken mugimenduak erakusten dizkiguna- publizitatea izaten du baita ere. Beste alde batetik, Babestutako ekitaldiak ere eskaintzen dira sare sozialetan, “La real Pesipédia Española te da más premios” edota “20 regalos al dia con Conguitos” bezalakoekin.

Egia esan, ez naiz Facebook-en oso zale. Lehen begiratu batean, ez dut inongo iragarki edo marketing ekintzarik ikusi, baina beste alde batetik, jakina da Marketing Virala egiten dela. Adibidez, Eibarreko orriaren zale egiteko eskakizuna heldu zitzaidan duela egun pare bat. Ez da adibide egokiena, helburu komertzialetik kanpoko ekintza delako, baina bada zerbait. Zale egiteko joera hau modan jartzen hasi da, eta ziur nago enpresa ezberdinek baliabide honi probetxua aterako diotela iragartzeko edo beraien web gunera bisitak lortzeko.

Ordea, inpaktu guzti hauen eraginkortasunaz aritzean, ez dut uste eragina hainbesterako denik, ez behintzat Burger King-en kasuak izandako arrakasta lortzeko bezalakoa. Oihartzun soziala lortzea ez da gauza erraza, hori bai, behin lortu ezkero, zabalkundea berehalakoa da, eta oso eraginkorra gainera. Moda kontua? Planifikazio egoki baten, sorte onaren eta kasualitatearen fusioa deituko nioke nik “moda” baino. Argi dagoena da, sare-sozialek publizitate eta marketing “berri” bat egiteko herramintak eskaintzen dituztela. Adibidez, eta nahiz eta nik ez dudan inoiz antzekorik ikusi (gehiago fijatuko naiz gaurtik aurrera, zin egiten dut), originaltasun pixka batekin aplikazio dibertigarriak sortu ditzakete enpresek Facebook erabiliaz zabaltzeko. Bestalde, ezin dezaket komentatu gabe utzi, sare-sozial hauek enpresa txikien publizitate-finantzaketaren arazoaren konponbidea izan daitezkeela; Badut tatutajeak egiten dituen lagun bat, Tuentiren bidez bere negozia martxan jarri eta bezero asko irabaztea lortu duena, soilik ezagunak lagun bezala gehituz (ARES tattoo, norbait piercing edo tatuaje bat egiteko ideiarekin badabil, Bilbon aurkitu dezake gune aproposa, esperanza kalean -alde zaharrean-, 18 zenbakian . Nire onespena badu behintzat :P ).

Arazoa ordea, erabiltzaileek duten “publizitate flitro automatizatuan” dago. Egunero ehundaka ekitaldi-ohar jasotzen ditugu, horietako asko publizitatea edo marketina direnak. Zuzenean “ignorar” botoia jotzen dugu eskaintzen duenari inongo kasurik egin gabe. Honen adibide garbia da gogoeta hau guztia idazteko egin behar izan dudan “aurre inspekzioa”, izan ere, ez nituen azaldutako gauzetako ia bat bera ere gogoratzen. Ni enpresako marketing saileko langilea banintz, besteengandik nabarmentzeko modua bilatzen ahaleginduko nintzateke, arduragabetasun horri aurka egiteko. Esan ohi den lez, imajinazioan dago boterea.

2.Zatia: Facebook-en esperimentua.

Ariketaren bigarren zatiaren helburua aste betean Facebook-en ahalik eta lagun gehien lortzea da. Honetarako, perfil faltsu bat sortu dut eta argazki bat txertatu diot -kasu honetan, nire arreba maitemindu duen mutil guapo baten argazkia aukeratu dut, "Pertsuazioa" hobeagoa izan dadin :D- eta 100 pertsoneri bidali diet lagun izateko eskaera. Aste bete barru ikusiko dugu zein izan den esperimentuaren emaitza, rekorra 2000 lagunetan dago :P

PD: Ez ditut mutil katxarroaren izen-abizenak emango, badaezpada ere XD

1. Ariketa: Interneteko web guneetako publizitateari dagokionez.

2010-02-20T13:54:00.017+01:00

Hauxek dira bisitatu ditudan web orriak (egin klik irudietan):

Zure hamabost minutuko bidaia horretan, dudarik gabe, publizitatearekin egin duzu topo. Gogora dezakezu…

a) Ze publizitate formatu topatu duzun? (banner, pop-up, spam…)

Ziur aski hainbat publizitate inpaktu jaso ditut web gune hauek bisitatzean, hala ere, ez dut bat bera ere gogoratzen, agian gune hauetako asko blogak direlako, edo publizitate gabe funtzionatzen dutenak, http://www.themeparkreview.com/ adibidez.

b) Ze markarekin egin duzun topo?

DGT guneak berak administrazio bat iragartzen du nolabait, beraz, aipatu daiteke erantzun gisa. Baina besteetan agertu den –agertu bada ere- publizitateari ez diot erreparatu, beraz, ezin dezaket markarik aipatu.

c) Mezu/edukiren batek zure atentzioa deitu du?

Publizitate edo iragarkiren bat gogoratuko banu, baietz esangu nuke. Ordea, ez dut bat bera ere gogoratzen beraz, logikoa denez, ez dit ezerk atentzioa deitu.

d) Publizitatearen aurrean men egin al duzu? Hau da, banner batek proposatzen zizuna jarraitu duzu, iragarle baten webgunera ailegatu zara?

Ez, aurretik pentsatutako guneetan zehar nabigatu dut, ez naiz sartzea espero ez nuen inon aritu.

Buelta zaitez orain ibili zaren orri edo dena delakoetara. Erreparatu publizitateari. Hor zegoen, ezta?

Bazegoen bai, bai sare sozialetan (Tuenti eta Facebook-ek “babestutako ekitaldiak” izenpean, hainbat aplikazio zein guneetara loturak eskaintzen dituzte). Hotmailek ere Bannera badu zeinek hartzailea jolastera gonbidatzen duen, irabaziz gero banerra kanpo-gune baterako lotura bilakatuko delarik. DGT-ren guneak ere trafikoaren erregulazioaren inguruan kaleratu dituen kanpainak ikusteko lotura bat eskaintzen du, publizitate komertziala ez den arren, publizitatea jarraitzen izaten du. Ebuddy eta blogek, ez dute publizitaterik, ezta Theme Park Review-k ere, momentuz ez duelako honen beharrik (nahiz eta guneko bazkideak garenok jaso dugun jada inkesta txikitxo bat, publizitatea jarriz gero zer iritzi izango genukeen jakitzeko).

e) Zure esperientzia hau eta aurrekoak kontuan hartuta, interneteko publizitateaz ze balorazio egiten duzu? Eraginkorra ote da? Asko/gutxi ikusten da? Erakargarria da? Hausnartu honen inguruan beste medioak kontuan hartuta.

Egia esan, bisitatu ditudan guneak ez dira publizitateak interneten duen rol berriaren isla egokiena, hala ere, gogoan ditut sarean zehar ikusitako iragarki komertzial batzuk –eta ez komertzialak ere bai, noski- eta esan daiteke presentzia geroz eta nabariagoa dela. Eraginkorra den edo ez, iragarleei galdetu beharko genieke, baina egia da internetek, beste euskarri batzuk ez bezala, aukera ezin hobeak eskaintzen dituela hartzailea ezustean harrapatzeko. Gainera, enpresa eta hartzailearen arteko harremana zuzenagoa izatea ahalbidetzen du internetek, beraien mezua transmititzeko bide berria.

Internetek urte hauetan suposatu duen iraultza kontutan harturik, normala da enpresen komunikazio arduradunek zein agentziek ere honi begira lan egitea. Duela gutxi izan genuen “Vender Online” jardunaldietara joateko aukera (blog honetan dago honen inguruko iruzkina), eta bertan modu zuzenean ezagutu genituen zeintzuk diren komunikazioaren alderdi guztien anbizioak eta itxaropenak interneten egindako publizitatearen inguruan. Enpresa txikientzat aukera ezin hobeagoa da, izan ere, oso bisitatuak diren web gune asko prest daude diru apur batengatik – behintzat, gainontzeko medioek dituzten tarifekin alderatuz- edonoren publizitatea eskaintzera. Arazoa, nire ustez, xede-taldearen zehaztapenean dator. Web gune “handiak” alde batera utzirik, hainbesteko oihartzuna ez duten guneetan, beraiek jorratzen duten gaiarekin zer ikusi gutxi duten publizitatea jaso dezakegu, zakila luzatzeko “andropenis” baten iragarkia ikusi nuen aurreko batean musika konpartitzeko web gune bat bisitatzen ari nintzela, adibide bat ematearren. Beraz, publizitatea badago, baina ez zaio hainbeste erreparatzen (orokorrean) web guneek dituzten irakurle/ikuslearen perfilari. Horregatik, mezu asko jasotzen ditugu internet bidez baina ez diegu erreparatzen, ariketatxoan gertatu zaidan bezala.

Hala ere, jardunaldietako hizlari guztiek argi utzi zuten internet dela etorkizuna, eta targetaren “arazo” hau ekiditeko hasi direla sistema ezberdinak aplikatzen, Google Analytics interneteko gorabeheren neurtzaile libre eta doakoa adibidez, beste batzuen artean. Guzti hau muintzat hartuz, aurreikusi dezaket interneteko publizitatearen garapen, hazkunde eta transformazio bat, non etorkizun gertu batean entretenimenduan, jolasean eta hartzailearen dibertimenduan zentratuko diren enpresak beraien mezua transmititzeko, gainontzeko euskarrien oztopo eta mugak hautsiz.

Publizitatearen eraginkortasunaren balizopenerako blog-a!

2010-02-20T13:23:00.006+01:00

Lauhileko berria hasi dugu jada Publizitate eta Harreman Publikoetako ikasleok eta ikasgai ezberdinen artean, badugu publizitatearen eraginkortasunean zentratutako bat. Blog baten bidez -irakurtzen ari zaren hauxe berauxe- egingo dugu lan, beraz, ERAGINKORTASUNA 2010 etiketapean gordeko ditut ariketa guztiak, izan ere, inakierrasti nire blog "pertsonala" da, gainontzeko kurtsoetako ariketa eta gauzatxoen "errekopilazioa". Beraz, bilaketa errazagoa izan dadin, Eraginkortasuna 2010 atalean, -blogaren eskuin aldean dago- aurkitu ditzakezue ikasgaiaren ingurukoak zerrendatuta. Honez gain, izen berdineko etiketan klikatuz ere bilatu daitezke, (Eraginkortasuna 2010, eskuin aldean baita ere, etiketen zerrendan).

Bestalde, lantxo guzti hauen planteamendua, informazioa eta gainontzeko ikasleen blogak ikasgaiko blog ofizialean daude. Norbaitek interesa baldin badu, bisitatu dezala.

Publizitatearen eraginkortasunaren blogean sartzeko, egin klik irudian:

Vender Online jardunaldien iruzkina

2009-11-30T20:19:00.007+01:00

Pasa den Azaroaren 26an, klaseko batzuk Joseba Etxebarriak antolatutako jardunaldietan parte hartzeko aukera izan genuen. Ordea, ez ginen askotxo izan eta hizketaldi benetan mamitsuak izan zirenez, ponentzia bakoitzaren sintesi bat egitea erabaki dut, interesatua dagoen edonork irakur dezan.

Bestalde, ahaztu zitzaidan lehen aldiz testua publikatu nuenean jardunaldiaren antolatzaileei eskerrak ematea ( Josebak gogorarazi dit detailetxo hau, arrazoi guztiarekin), izan ere, gure klasekideetako batzuek parte hartu dute prozesuan. Iratxe Varela, Janire Quintairos eta Nekane Ortega aritu dira prestaketekin, unibertsitateko beste ikasle batzuekin batera, beraz, eskerrik asko berriz ere. Besterik gabe, hauexek izan ziren ponentziak:

¡DIOS MÍO, VOY A VENDER POR INTERNET!

Peio Ruiz Merkatu-ko zuzendariak eta Antxon Txapartegi Txakoliaren jatorri-izenaren idazkariak eman zioten hasiera ekitaldiari, jorratuko zen gaiaren inguruan sarreratxoa eginez. “¡Dios mío, voy a vender por internet!” lemapean azaldu zigun nola negozioen gakoa berrikuntzan datzala, naiz eta zaila den hasieran, denbora eta lan handia exijitzen duelako. Bere hitzetan, berritzea ez da zailena, betiko moldeekin apurtzea baizik.

Berritze prozesu motela da. Hornitzailea, merkatua eta, batez ere, erabiltzailea prestatu behar dira, izan ere, atzean gelditzen denak funtzionatzeari uzten dio. Orain arte, ohiko kanalak subjektutik subjektura funtzionatu izan du, hau da, bitartekari askoren bitartez heltzen da hartzailearengana enpresaren mezu, zerbitzu edo delakoa. Interneten bidez ordea, enpresa eta bezeroaren tratua zuzena da

Hau ongi daki Antxon Txapartegik, bere enpresa Online saltzen hasi delako. Abantailen artean, hedapen mugen zabaltzea aipatu zuen. Lehen, enpresak azoka ezberdinetan saltzen zuen bere produktua, modu zuzenean. Honek, merkatu gutxietara edota diru asko ordaintzeko prest zegoen bezero kanpotarrengana heltzea ezintzen zuen.

Interneten bidez, ordea, enpresaren mezua edo filosofia bitartekariek desitxuratu gabe heltzen da hartzailearengana, kosteak murrizten dira eta salmenta indibidualen igoera garrantzitsua ematen da, askoz errazagoa baita etxetik erostea azoka batera mugitzea baino.

MERKATU enpresak kudeatzen du Txakoliaren web gunea. Beraientzat ezinbestekoa da irudi on bat ematea bezeroa erostera anima dadin. Gainera, merkatu tradizionalak edota lehiakideek eskaintzen dutenetik haratago joan behar da enpresa, horrela bezeroak berriz ere gurean errepika dezan.

GOOGLE ANALYTICS

Guillermo VIlaroig, Overaliako zuzendari gerentea aditua da Google Analytics delakoan. Baliabide honen bidez, interneten gertatzen dena neurtu daiteke, baita komertzio elektronikoa ere. 2000. Urteaz geroztik, publizitatearen “ziber-presentzia” izugarri igo da, eta honekin online saltzeko joera berria. Beraz, informazio guzti hauek neurtzeko beharra sortu da. Google analytics-ek, dohain eskaintzen du informazio hau.

Enpresek, internet bidez saltzeko aurrerapausoa ematen dutenean, ondo jakin behar dute beraien web plataforman trafikoa sortzen, eskainitako zerbitzuak ezagutzera emateko. Honetarako plangintza bat beharrezkoa da, bakoitzaren produktuaren egoera jakiteaz gain, -erabiltzaileen artean duen onarpena, adibidez- konpetentziaren gorabeherak ere ezagutu behar direlako.

Guzti honetan benetan lagungarria da Google Analytics. Hala ere, ezer ez da posible tresna hau erabiltzen jakiten ez bada. Enpresaren mugimendu guztiak etiketatu behar dira ondoren analizatu ahal izateko, eta gero, egoki analizatzen ere jakin behar da. Datuek esango digute zerk egiten duen huts eta zerk funtzionatzen duen.

Aitor Castañedak honen inguruan iruzkina egin du Publizitario blogean:
http://publizitario.blogspot.com/2009/11/osteguneko-jardunaldien-material.html

YA TENGO LA TIENDA ONLINE, ¿Y AHORA QUÉ?

Juan Pablo Giménez, Demini Business Online-ko zuzendaria da eta gure ziber-dendara bezeroak erakartzeko zer egin behar den azaldu zuen. Deminik, enpresei interneten presentzia izan dezaten laguntzen die, baita trafikoa areagotzen (jendeen bisitak areagotu, alegia) eta, azken finean, diru gehiago lortzen.

Enpresek bezeroak bilatzen dituzte, eta bezeroek enpresak, batez ere internetek eskaintzen dituen bilatzaile ezberdinak erabiliz. Bezeroak nahi duena bilatuko du, eta enpresa batera edo bestera helduko da. Baina bilatzaileak erabiltzeaz gain, erabiltzaile batzuek interakzionatu egingo dute (youtube bezalako plataformetara joanez), informatu egingo dira ( Terra edo El Mundo.com bezalako guneetan) eta beste askok parte hartuko dute (sare sozialak, Tuenti edo Facebook, besteen artean).

Beraz, bezero guztiei heltzea helburu garrantzitsua da. Enpresak bere burua iragarri behar du, erabiltzaileak lortu behar ditu eskaintzen dituen zerbitzuak hobetuz. Eta, batez ere, errepika dezan bilatzen da.

Honetarako marka ezinbestekoa da, identifikazio ikurra baita. Gainera, gure eskaintza besteena baino hobeagoa zergatik den zehaztu eta erabiltzaileek iritzia eman dezaten ahalbidetu behar dugu. Gure Targetari “bere hizkuntzan mintzatu behar zaio”, bilatzaile edo bestelako plataformetan gure burua erakutsi behar dugu, analisiak egin behar dira… Ospea bilatzen da, orokorrean, eta ospea, trafiko handiaz edota ordainduz lortzen da (Googlen lehen plantan gure iragarkia azaldu dadin ordaindu dezakegu, edo trafikoa handituz maila berdinera heldu). Sare sozialek paper geroz eta garrantzitsuagoa dute guzti honetan, erabiltzaileen parte hartzearekin trafikoa lortzea errazagoa delako. Marketin teknikak ere ezagutu behar dira, baita aplikatu ere.
Hala ere, hanka sartzeez ikasten da, eta datuak analizatu behar dira berrikuntzak edo eraldaketak egiteko, honela, enpresaren helburua lortu arte.

PERSUABILIDAD PARA VENDER ONLINE

Multiplica taldeko Esther Pallarések, behin trafikoa lorturik, gehiago saltzeko zer egin behar den azaldu zuen bere ponentzian. Erabiltzaileek bilatzen dutena aurkitzen dute, trafikoa sortzen dute, baina askotan ez dira erostera animatzen. Estherrek “pertsuabilitate” terminoa aurkeztuko digu, bezeroa erakartzeko gure web plataforman arrazionaltasuna eta emozionaltasuna islatzeko gaitasuna, nolabait esatearren.

Zazpi ardatzetan oinarritzen da pertsuabilitatea:

1-Lehen inpresioa funtsezkoa da. Garrantzizkoa da eskaini nahi den irudiaren eta enpresak eman dezakeenaren artean komunztadura egotea. Segundo batean, erabiltzaileak lehen sentsazioa izango du, beraz, ondo landu behar da mezua eta estetika. Gainera, konpetentziatik bereizi behar da lehen bai lehen, markaren bidez.

2-Sinesgarritasuna. Bezeroaren dudak dira arazo larriena. Beraz, kalitate bermeak, informazioaren eskaintzak, bezeroari arretak eta abarreko baliabideek hauxe ekiditen lagundu dezakete.

3-Pertsuabilitatearen arkitektura. Azken finean, ahalik eta gehien saltzea bilatzen da. Hau dela eta, gure plataformak bezeroak beste aukera batzuk ere ezagutu ditzan ahalbidetu behar du, agian A, -benetan bilatzen zuena- erosteaz gain, B ere erostea nahiko duelako.

4-Eskainitako edukiak. Bezeroa eroso sentitu behar da erosketa prozesuan, nabigazioa erraztu behar zaio edukien aurkezpen egokiarekin. Gure web guneak bilatze metodoa badu, eta bezeroak eskatzen duena aurkeztu ezin bada, aukerak eskaini behar zaizkio, bilaketaren antzeko zerbait izango dena. Hortaz gain, gomendioak ere eman daitezke. Azalpen bideoak ere lagungarri dira, irakurketa baino inpaktu handiagoa sortzen dutelako, eta nola ez, guzti hau ondo neurtu behar da erabiltzailea ondo harrapatu ahal izateko.

Pertsuabilitate teknika hauetan ere badago erabiltzaileen iritzien azalpena. Hainbat esparrutan, bezeroek gure produktuaz duten iritzia ematea egokia izan daiteke. Bilatzaileetan erakutsiko den mezua ere analizatu behar da, targetaren arabera hizkuntza bat edo bestea erabiliko dugu eta behar dena soilik aurkeztuko da, erakartzea berehalakoa izan dadin.

5-Erabilitako Copy-ak. Copyak konbentzitzen laguntzen duten hitzak dira. Hitz hauek bezeroaren emozio eta sentsazioetan kolpatu behar dute, alde arrazionala erakusteaz gain. Nolabait, copyak gogoetara bultzatu behar dute erabiltzailea; behar dutena guk eskainitakoa dela esan behar zaio, eta honetarako ezin hobeak dira bideoak.

6-Klik bat produzituko duten atentzio deiak. “Eros ezazu!” bezalako mezuak dituzten botoiak azken pausoa dira. Kasu honetan, bertan klikatuz gero, bezeroak erosketa egingo du. Horregatik, botoi hauen kokalekua zaindu behar da (esker eskuin irakurtzen dugu eta goitik behera, beraz, behealdean, eskuman jarri daiteke, horra heltzerako bezeroak informazio guztia asimilatu duelako), baita bertan idatziko dena ere.

7-Urgentzia sentsazioa sortzea. “Azken eskaintza! Eraman ezazu orain!” bezalako esaldiek, urgentzia sortzen dute bezeroengan. Beldurra sartzen zaio eta azkarrago eta irrazionalago erabakiko du. Hori bai, eskaintza egiazkoa izan behar da, bestela, sinesgarritasunean hutsune bat izango dugu eta honek enpresarekiko iritzia kaskartuko du. Eskaintza aurkezterik ez badago, deskontuak eman daitezke, produktu konkretu bat azpimarra daiteke…

Iñaki Errasti Muñoa

Atzera begira: 17. Biktima

2009-11-27T16:47:00.025+01:00

Duela pare bat urte egin genuen bideoa aurkezten dut jarraian, Izaro Apraiz, Ander Fernandez, Maialen Aizpurua eta laurok filmatu eta editatua. Lizentziaturako lehen mailan aurkeztu genuen Publizitatearen mintzaira irakasgaian.

Barbie-ren inguruko Blog berria

2009-11-27T16:28:00.011+01:00

Publizitatearen historia irakasgaian aurkeztu dugu Raquel Acebes eta biok Barbie-ren inguruan egindako ikerketa jasotzen duen blog berria.

Bertan, Estatu Batuetan gertatutako gorabeherak azaldu ditugu, panpinaren iragarkietan izan duten islan oinarrituta. Ikus-entzunezko adibideak ere txertatu ditugu.

Klik eg i n blogera sartzeko

Bigarren ataza: finantza krisia

2008-12-11T16:59:00.007+01:00

Hona hemen etorkizuneko Campus berria

2008-11-19T10:52:00.001+01:00

Top 7 zerrenda

2008-10-28T15:59:00.013+01:00

1. Youtube http://www.youtube.com/

Youtube web gunea, bideo digitalak konpartitzea ahalbidetzen duen gunea da. Arrakasta itzela lortu du urteetan zehar eta, gaur egun, edonolako bideoak aurki ditzakegu bertan. Honez gain, bideo bakoitzean komentarioak utzi daitezke, beti ere, erregistratuz gero. Aisirako eta baita arlo profesionalerako web gune beharrezkoa da, lehenengo postua beraz, youtuberentzat.

2. Zamzar http://www.zamzar.com/

Web gune honeen bidez, ia edozein formatutako fitxategiak beste formatu batzuetara moldatu daitezke, beti ere 100 mb. eko tamaina mugarekin. Pauso gutxitan lortu dezakegu gure helburua, bukaera, email bidez moldatutako fitxategia jasoko dugularik. Programa ezberdinak erabili behar hori gainetik kendu digulako, Zamzarri bigarren postua.

3. Softonic http://www.softonic.com/

Softonic-ek 80.000 programa baino gehiago deskargatzeko aukera ematen digu, askotan dohainik. Nolabait, enpresa honenen eskaintzen bilduma bat da softonic. Taldeetan banatuta aurki ditzakegu programak, erabiltzaile ezberdinen puntuazioarekin batera. Edozer aurkitu daiteke bertan modu erraz batean, beraz zerrendan kokatzea beharrezkoa iruditzen zait.

4. EITB http://www.eitb.com/

Euskal Irrati Telebistaren web guneak hainbat gauza eskaintzen ditu, besteak beste, zuzeneko irratsaioak, argazkiak, foroak, bideoak... Pertsona ez-profesionalen lanak ere igotzeko aukera eskaintzen du, erabiltzaileen gerturapen gisa. Web gune benetan konpletoa. Informazio alorrean, batez ere, gailendu denez, 4 postua web gune honentzat.

5-Hotmail http://www.hotmail.com/

Doako posta elektronikoa da Hotmail. Testuez gain, fitxategi

ezberdinak eta baita argazkiak ere bidali daitezke denbora oso laburrean.

Memoria kapazitate handia dauka eta erabilera errazagaitik nabarmentzen da. Asko erabiltzen dudanez, zerrendan kokatu dut.

6- Wikipedia http://eu.wikipedia.org/

Dudarik gabe, entziklopedien artean honena da Wikipedia, librea baita eta doakoa gainera. Sarrera anitzak aurki ditzakegu, eta edonorek moldatu dezake bertako informazioa, baita osatu ere. Benetan lagungarria denez, 6 postua emango diot.

7- Google http://www.google.es/

Plataforma ezberdinez ornitu da denborarekin Google. Gaur egun, posta elektronikoa, bideoteka, informazio bilatzailea, argazki bilatzailea, itzultzailea... da Google, edonorentzat ezinbestekoa.

...eta kitto! Euskara Elkartea

2008-10-28T15:37:00.004+01:00

… eta kitto! Euskara eta kulturarekin konpromisoa duen elkartea da, Eibarko udalak aurretik kaleratzen zuen hilabetekariaren izena hartuta, euskara sustatzeko hainbat ekitaldi antolatzen dituelarik.

1. Historia
2. Gida komertziala
3. Txikitto! Aldizkaria
4. …eta kitto! Astekaria
5. Bertso taldea
6. Euskara zerbitzuak
7. Kulturgintza
7.1. Urkora igoera
7.2. Aratusteak
7.3. Ipurterre ipuin lehiaketa
7.4. San Juanak
7.5. Euskal Jaialdia
7.6. Ikastolen aldeko jaia
7.7. Illunabarrian
7.8. Harixa emoten
7.9. Sagardo eguna
7.10. Umeentzat ikuskizuna
7.11. Gabonetako loteria
7.12. Kirolkitto!
8. Astean behin euskaraz berbetan
9. Kanpo loturak

Historia

1988. urtean eman ziren lehenengo pausoak, Eibarko udalak, Mikel Larrañagak kaleratutako Euskaraz eta kitto! bandoko azken bi hitzak hartu eta izen berdineko hilabetekaria sortzea erabaki zuenean. Bost urte beranduago, 1992. Urtean alegia, Eibartar euskaltzale talde batek …eta kitto! Euskara Elkartea sortu zuen, euskararen aldeko hainbat ekitaldi antolatzeko asmoz, paella lehiaketak, San Juan suaren berreskuratzea eta Arrateko bertso afaria, horien artean. Bertsolaritza, komunikabide eta kulturgintza azpi taldeak sortu ziren, besteak beste.

Geroztik, bazkide kopuruak gora egin du eta urte-urte, ekimen berriak sortu ditu elkarteak, beste batzuk desagertu diren modu berean. Gaur egun, hainbat sail ezberdin jorratzen dira elkartean, beti ere helburu berdinarekin: Euskara sustatzea.

Gida komertziala

1993. urtean, lehen gida komertziala kaleratzeko erabakia hartu zen. Eibar, Ermua, Soraluze eta Mallabiko komertzio eta enpresen datuak biltzen zituen gidak. Egun, ordea, Eibarko komertzio, enpresa eta denden telefono eta helbideak batzen ditu, eta 10.000 ale kaleratzen ditu urtero. Elkartearen web gunean ere badago eskuragarri gida hau. Klikatu hemen gunean sartzeko.

Txikitto! Aldizkaria

1996. urtean kaleratu zen hilabetekari honen lehen alea, Eibarko udalaren laguntzarekin eta herriko ikastetxe guztien elkarlanarekin. LHko 3. Eta 6. Maila bitarteko ikasleek jasotzen zuten aldizkaria hasiera batean, baina izandako arrakastak bultzatuta, gaur egun LHko haur guztien eskutan dago Txikitto!. Ezaugarri garrantzitsuena, haurren parte hartze zuzena da, izan ere, bertako orrialde asko haurrek beraiek prestatutakoak dira.

…eta kitto! astekaria

1988. urtean sortu zen, gaur egun …eta kitto! elkartearen eskutan dagoen produkturik ezagunena, …eta kitto! aldizkaria, hain zuzen. Eibarko Udaleko Euskara Batzordeak sortu zuen, euskara hutsez sortutako informazioa ahalik eta Eibartar gehienek jaso eta irakur zezaten. 1992. Urtean …eta kitto! elkarteak kudeatzen du aldizkaria, hasiera batean hilabetekaria, ondoren hamaboskaria eta egun, astekaria dena.

Urteak pasa hala, aldaketa nabarmenak jasan ditu aldizkariak. Boluntario moduan idazten zuen jendeak bere jaiotzan baina gaur egun, profesionalen esku dago astekaria. Izan ere, 6 pertsonek egiten dute lan bertan egun osoko dedikazioarekin, honez gain, 15 kolaboratzaile baino gehiago ditu astero. Eibarko berriak jasotzeko erreferente bihurtu da aldizkaria, euskara hutsean gainera.

Bertso taldea

Bultzatu eta eutsi beharreko alor garrantzitsu bezala ikusten dute bertsolaritza …eta kitto! Elkartekoek, hau dela eta, hainbat ekitaldi antolatzen dituzte urtean zehar, Bertso Taldearen gidaritzapean. Arrateko jaietan, adibidez, denborarekin oso ospetsu bilakatu den bertso afaria antolatzen dute urtero. Punta-puntako bertsolariak ekartzen dituzte eta ondorioz, zaletuentzat, ezin besteko zita bihurtu da bertso afaria, jendetza izugarria biltzen baitu ekitaldiak. Bestalde, San Andres jaietan, San Andres Bertso Paper Lehiaketa antolatu ohi dute eta irabazleek, Gazteen Bertso Jaialdian abesteko aukera dute, bertsolari profesionalekin batera.

Euskara zerbitzuak
…eta kitto! euskarazko elkarteak badu konpromiso handia euskararen sustapenarekin. Euskararen erabilera arlo ekonomiko-sozialean txertatzea nahi izan du elkarteak, izan ere, euskarak maila akademiko- ludikoa gainditu eta lan hizkuntza izatea bilatzen dute, harreman profesional zein komertzialean, euskara beste hizkuntza baten antzera islatu dadin. Horretarako, euskara plana integralak eskaintzen ditu elkarteak, enpresa, establezimendu zein entitate edo elkarteetan. Besteak beste, euskara planak, diagnostiko linguistikoak, itzulpenak, erabilera neurketak eta motibazio saioak.

Kulturgintza

Euskal kulturarekin ere badu konpromisoa elkarteak eta hamarnaka ekintza antolatzen dituzte urtean zehar. Hauexek dira horietako batzuk:

Urkoko igoera
Urte berriari hasiera osasuntsua emateko, Klub Deportivokoek Urkora igoera antolatzen dute. Ixuan, hamaiketakoa eskaintzen zaie mendizaleei, txorizoa eta salda beroarekin sabela berotzeko.

Aratusteak
Aratuste jaietan ere elkarteak urrats nabarmena uzten du urtero. Izan ere, jaiei hasiera emateko, kaldereroen etorrera antolatzen da hainbat talderekin elkarlanean eta, bestalde, aratuste egunean gaztetxoek PLAYBACK lehiaketan parte hartzeko aukera dute.

Ipurterre ipuin lehiaketa
Gazteen artean irakurtzeko zaletasuna pizteko asmoz antolatzen den lehiaketa da. Urte-urte parte-hartzea handiagoa da, baita lanen kalitatea ere. Lan irabazleak Txikitto! Aldizkarian argitaratzen dira.

San Juan jaiak
Eibartarrentzat bereziak dira San Juan jaiak, hori dela eta, ekainaren 23an Untzaga plazan sua pizteko ohitura berreskuratu zuen …eta kitto! Elkarteak. Bertara, elkarte askotako jendea gonbidatzen dute urtero sua pizteko.

Euskal Jaialdia
San Juan jaietan Euskal Kultura eta Herri Kirolak bultzatzeko intentzioarekin antolatzen da Euskal Jaialdia. Momentuko herri kirolari ospetsuenak gonbidatzen dituzte Eibarrera, herritarrak kirolarien norgehiagoka ezberdinen testigu izan daitezen.

Ikastolen aldeko jaiak
Euskal Herriko ikastolen alde egiten diren jaiekin bat eginda, autobus zerbitzuak antolatzen ditu elkarteak Araba Euskaraz, Ibilaldia, Herri Urrats, Nafarroa Oinez eta Kilometroak ospatzen diren egunetan.

Illunabarrian
Hilero, gai ezberdinen inguruan hitzaldi saioak antolatzen ditu elkarteak Iraila eta Ekaina bitartean. Arratsaldeko 19.00 eta izaten da eta era guztietako hizlariak bildu dituzte egun arte.

Harixa emoten
Eibarko literaturazaleentzako antolatzen den ekitaldia da. Irakurle talde bat bildu, liburu bat aukeratu eta epe batera, liburuaren idazlea eta irakurleak …eta kitto!-ko lokalean batzen dira.

Sagardo eguna
Udazkenaren etorrerarekin batera, elkarteak Sagardo eguna antolatzen du beraien kale presentzia nabarmentzeko. Leku ezberdinetako sagardoa dastatzeko aukera dute bertara hurbiltzen direnak. Basoa erosiz gero, nahi haina sagardo edan daiteke, baita pintxoak jan ere.

Umeentzako ikuskizuna
Gabon inguruan, etxeko txikienentzat zuzenduriko ikuskizuna antolatzen da. Urtero, Takolo, Pirritx eta Porrotx pailazoek euren ikuskizuna ekartzen dute Eibarrera eta ume zein helduen harrera ezin hobea izan ohi da.

Gabonetako Loteria
Gabon jaietan loteria ateratzen du ...eta kitto! Euskara Elkarteak. Eibarko dendari, tabernari eta bazkideen laguntzari esker saltzen dituzte boletoak. Abenduaren 22ko zozketaz gain, otarra ere zozketatzen dute egun batzuk lehenago.

Kirolkitto!
Kirol taldeak euskalduntzeko helburua du antolaketa honek. Gabon Zahar egunean, urteko kirolaririk esanguratsuenei banatzen zaizkie sariak. Izen eta prestigiodun sari hauek, urte osoan egindako lana baloratzen dute.

Astean Behin Euskaraz Berbetan
…eta kitto! Euskara elkarteak eta Eibarko bi euskaltegik, AEK-k eta Udal Euskaltegiak antolatutako programa da Berbetan, euskaldun berriei zuzendutakoa. Euskaltegi orduetatik kanpo, euskaldun berriez eta euskaldun zaharrez osatutako taldeak sortzen dira, ezagutzatik praktikarako saltoa eman dezaten. Honez gain, Jarraipen Batzorde bat ere sortu dute taldea jarraitu eta baloratzeko.
Taldeak elkartzeaz gain, bestelako ekitaldiak antolatzen dituzte, hala nola, afariak, elkarte ezberdinetara bisitak… Erantzuna, nola ez, oso ona izan da.

Kanpo loturak
…eta kitto! Euskara Elkartearen web gune ofiziala

Herri izenen ariketa

2008-10-23T12:47:00.006+02:00

Erantzunak

0.A- Al Gore estatubatuarrak, luxenburgoko Dukerri Handia bisitatu ostean, Euskal Herriko bidea hartuko du mintzaldi bana emateko Bilbaon eta Gasteizen.

1.A-Zenbait manifestaldi jendetsu egin dira azken egunotan Kazakhstango Errepublikan

2.A-Litekeena da Marokon edo Gambian izatea Aldaketa Klimatikoari buruzko datozen topaketak

3.A-Bolivia gutxi dira bertako hiru hizkuntzak, kitxua, aimara eta gaztelania alegia, menperatzendituztenak.

4.A-Georgiako hiriburuan, Tbilisin alegia, euskaldunak non bizi diren eta georgiarrak etaeuskaldunak ahaideak izan daitezkeela dakite askok.

5.A-Abkhaziarrak georgiarren senideak dira hizkuntza aldetik; osetiarrek, ostera, kurdoenhizkuntzaren multzokoa dute mintzaira, senidetasunik gabekoa, alegia.

6.A-Euskal arrantzaleek Seychelletako Errepublikara jo dute ezinbestean, itsaspiraten

beldur.

Butterfly

2008-10-14T10:47:00.004+02:00

Bideoak igotzen ikasten hasteko, hauxe igoko dut froga bezela. Badulake tabernak antolatutako Baduclips lehiaketan parte hartu zuen bideoklipa da, gure lagunek egina. Ez zituzten sari guztiak irabazi baina guretzako guztietatik honena zan. Ala ba, ia gustatzen jatzuen.

El mostruo de las galletas

2008-10-14T10:27:00.007+02:00

Karrerak badauzka gauza honak, baita txarrak ere. Goiz esnatu beharrak, bidai luzeak eta beste zenbait faktorek eguna iluntzen dute zertxobait. Hala ere, autobus bidaiek askorako ematen dutenaren froga dakarkizuet. Maialen eta Izarori dedikauta. (youtubeko zuzenbidea txertatu dut hemen, hurrengo sarreretan zuzenean igoko ditut bideoak).

Zibermunduan murgilduz

2008-10-14T10:14:00.005+02:00

Kaixo!

Lehenago edo beranduago banekien horrelako blog bat zabaldu beharko nuela, izan ere, egunez-egun, jende gehiagoren ahoetan dago internetek eskaintzen duen baliabide hau. Ez naiz internet zalea, baina Publizitatea ikasten ari naizenez, "behartuta" nago horrelako bat izatera. Hala ere, zihur nago denborarekin gustoa hartuko diodala.

Telebista kate bat sortu dut iada, wikipediako sarrera bat prestatzen ari naiz baita ere... Zibernetizatze prozesuan nago, dudarik gabe. Beraz, noizbehinka (hasieran "behartuta" eta geroxeago (badakit nik azkenean gustatuko zaidala) bestelako motiborik gabe, blog hau gauza interesgarriz osatzen joango naiz, pixkanaka-pixkanaka.

Besterik gabe, goazen inbestigatzera.